ޑައުންސިންޑްރޮމް ހުންނަ ކުއްޖަކަށްވުމުން، ފަސް ސްކޫލަކުން އެ ކުއްޖާއަށް ތައުލީމީ ފުރުސަތު ދޭން ދެކޮޅުހެދި މައްސަލަ ބެލެނިވެރިއަކު ރައީސްލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަމާލުކަމަށް ގެނެސްފިއެވެ.

ރައީސުލްޖުމްހޫރިއްޔާ އާންމު ރައްޔިތުންނާ ބައްދަލުކުރެއްވުމަށް ފަށްޓަވާފައިވާ "ރައްޔިތުންގެ އަޑު" ސިލްސިލާގެ ތެރެއިން، ޑައުންސިންޑްރޯމް ހުންނަ ކުއްޖެއްގެ މަންމަ ފާތިމަތު ފައިރޫޒާ އާދަމް ވަނީ ރައީސާ ބައްދަލުކުރައްވައި ތައުލީމީ ނިޒާމުގައި ހުރި ކަންބޮޑުވުންތައް ފާޅުކޮށްފައެވެ. މި ބައްދަލުވުމުގައި، އޭނާގެ ދަރިފުޅަށް ޑައުންސިންޑްރޮމް ހުރުމުގެ ސަބަބުން ރާއްޖޭގެ 5 ސްކޫލަކުން ޖާގަ ދިނުމަށް އިންކާރުކޮށްފައިވާކަން އޭނާ ފާހަގަކުރިއެވެ.

މީގެ އިތުތުރުން، ޚާއްޞަ އެހީއަށް ބޭނުންވާ ކުދިންނަށް ބޭނުންވާ ތެރަޕީ ހޯދުމުގައި ހުރި ދަތިތަކާއި، ބޯހިޔާވަހިކަމުގެ މައްސަލަތައްވެސް ބެލެނިވެރިޔާ ވަނީ ރައީސާ ހިއްސާކޮށްފައެވެ.

މި ކަންބޮޑުވުންތައް އަޑުއެއްސެވުމަށްފަހު ރައީސް ޑރ.މުޙައްމަދު މުޢިއްޒު ވިދާޅުވީ، ތައުލީމީ ނިޒާމުގައި ހުރި މިފަދަ މައްސަލަތަކަށް ހައްލު ހޯއްދަވައިދެއްވައި، ހުރިހާ ކުދިންނަށްވެސް ހަމަހަމަ ފުރުސަތުތައް ފަހިކޮށްދެއްވުމަށް މަސައްކަތްޕުޅު ކުރައްވާނެ ކަމަށެވެ. އަދި އެކަން ކުރުމަށް އަޅަންޖެހޭ އެންމެހާ ފިޔަވަޅުތައް އަޅުއްވާނެ ކަމުގެ ފުރިހަމަ ޔަގީންކަން ރައީސް ވަނީ ދެއްވާފައެވެ.