މިއަދުން ފެށިގެން ރާއްޖޭގައި ވޭޕްގެ ބާވަތްތައް ބޭނުންކުރުން މަނާވެއްޖެއެވެ.

ވޭޕް މަނާވެފައި މިވަނީ ވޭޕް އެތެރެކޮށް އޭގެ ވިޔަފާރި ކުރުމާއި އެ ބޭނުން ކުރުން މަނާކުރުމަށް ދުންފަތް ކޮންޓްރޯލް ކުރުމާ ބެހޭ ގާނޫނަށް އިސްލާހު ގެނައުމުގެ ބިލު މިދިޔަ ބުދަ ދުވަހު ރައީސް ތަސްދީގު ކުރެއްވުމާއި ގުޅިގެން އިސްލާހަށް އަމަލުކުރަން އޭގައި ބުނެފައިވަނީ ނޮވެންބަރު 15 ކަމަށްވާތީއެވެ.

ބިލުގައި ދުންފަތް ކޮންޓްރޯލް ކުރުމުގެ ގާނޫނަށް މައިގަނޑު ތިން އިސްލާހެއް ގެންނަން ވަނީ ފާސްކޮށްފައެވެ. އެގޮތުން، މި މަހުގެ 15 ވަނަ ދުވަހުން ފެށިގެން ރާއްޖޭގައި ވޭޕް ބޭނުން ކުރުން މަނާކޮށް އަދި ދުންފަތުގެ ވިޔަފާރި ކުރެވޭނެ އެންމެ ހަގު އުމުރަކީ 21 އަހަރު ކަމަށް ހެދުމަށް ވަނީ ހިމަނާފައެވެ.

އޭގެ އިތުރުން، މި އަހަރުގެ ޑިސެންބަރު މަހުގެ 15 ވަނަ ދުވަހުން ފެށިގެން ރާއްޖޭގައި ވޭޕް ބޭނުންކުރުން މަނާކުރަން ވެސް ވަނީ ހިމަނާފައެވެ. އަދި މިގާނޫނާ ޚިލާފުވާ ފަރާތްތަކަށް ބޮޑެތި ޖޫރިމަނާތައް ވެސް ބިލުގައި ވަނީ ހިމަނާފައެވެ.