ފަރުކޮޅުފުށީގައި ހަދާފައިވާ ކަރަންޓީން ފެސިލިޓީގައި ތިބި އެންމެން މިރޭގެ ވަގުތެއްގައި އާކަރަންޓީން ފެސިލިޓީއެއްގެ ގޮތުގައި ކަނޑައެޅި ވެލިދޫ ރިޒޯޓަށް ބަދަލުކުރާނެ ކަމުގައި “ރަސް އޮންލައިން” އަށް މައުލޫމާތު ލިބިއްޖެއެވެ.

ވަރަށް މުއުތަބަރު ފަރާތަކުން މި ނޫހާ މައުލޫމާތު ހިއްސާ ކުރައްވަމުން ވިދާޅުވީ ފަރުކޮޅުފުށީގައި ތިބި މީހުން ވެލިދޫ ރިޒޯޓަށް ބަދަލު ކުރަނީ އެއްގޮތަކަށް ވެސް އެތަނުގެ ފެންވަރު ދަށްވެގެން ނޫން ކަމަށެވެ. އޭނާ ވިދާޅުވީ ރާއްޖޭގައި ކަރަންޓީން ކޮށްފައި ވިޔަސް ފަތުރުވެރިން ތިބެން ޖެހޭނީ ރިޒޯޓެއްގެ އިހުސާސް ނުގެއްލޭ ފެންވަރުގައި ކަމަށެވެ. ކަރަންޓީންގައި ތިއްބަސް ދިވެހިރާއްޖޭގައި ފަތުރުވެރިން ތިބެފަދާނީ ރިޒޯޓެއްގައި ކަމަށާއި އެމީހުން އެނބުރި ގޮސް ތިމަންނާމެން ކަރަންޓީނު ކޮށްފައިވެސް ތިބީ ރިޒޯޓެއްގައި ކަމަށް ބުނެވެން ޖެހޭނެ ކަމުގައި މައުލޫމާތު ދެއްވި ފަރާތުން ވިދާޅުވިއެވެ.

އެންމެ ފަހުން އެޗްޕީއޭއިން އާންމު ކޮށްފައިވާ ހިސާބުތަކުން ދައްކާ ގޮތުގައި ފަރުކޮޅު އައިސޮލޭޝަންގައި 25 މީހުން އެބަތިއްބެވެ. މީގެއިތުރުން ކޯވިޑް-19 އާއި ގުޅިގެން މީހުން އެކަހެރިކޮށް ކަރަންޓީން ކުރަމުން ގެންދަނީ ހުޅުލޭ އައިލެންޑް ހޮޓަލާއި ވިލިވަރުގައެވެ.

ދަރުމަވަންތަ ހޮސްޕިޓަލުގައި އެކަހެރިކޮށް ފަރުވާ ދެނީ ހާލު ދެރަ މީހުންނަށެވެ. ދަރުމަވަންތަ ހޮސްޕިޓަލުގައި ހަތަރު މީހުން އެކަހެރިކޮށްފައި ތިބިއިރު ކުރިން ހާލުބޮޑުވެގެން ފަރުވާ ދެމުން ދިޔަ ދެމީހުންގެ ހާލު ރަނގަޅުވެ އޮކްސިޖަންވެސް މިހާރު ނައްޓާލާފައިވާ ކަމުގައި މިއަދު ދަރުބާރުގޭގައި މައުލޫމާތު ދެބުން ހާމަކޮށްފައިވެއެވެ. ދަރުމަވަންތައަށް ގެންދިޔަ އަނެއް ދެމީހުން ބައްޔަށް ނެގެޓިވްވެ ނޭވާލާ ނިޒާމުގެ އެހެން ބައްޔަކަށް ފަރުވާދެމުން ގެންދާތީ އެމީހުން އެހެން ބަޔަކަށް ބަދަލު ކުރެވިފައިވާ ކަމުގައި ކޮރޯނާވައިރަސްއާއި ބެހޭ ސަރުކާރުގެ ތަރުޖަމާން މަބްރޫކް އަޒީޒް މިއަދު ވިދާޅުވިއެވެ.