ދަރިވަރުން ސްކޫލްތަކަށް ޙާޟިރުވެ ދިރާސީ އަހަރު މިއަދު ފެށިގެން މިދިޔައީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި، ސިއްޙީ ދާއިރާގެ ކުޅަދާނަކަމުން ކަމަށް ރައްޔިތުންގެ މަޖިލީހުގެ ކުރީގެ ނާއިބު ރައީސް ރީކޯ މޫސާ މަނިކު ވިދާޅުވެއްޖެއެވެ.

ފަހަކަށް އައިސް ސަރުކާރާއި، ރައީސް ޞާލިޙަށް ވަރަށް ބޮޑަށް ތަޢުރީފް ކުރަށްވަމުން ގެންދަވާ ރީކޯ މޫސަ މިއަދު ވިދާޅުވީ، ސިއްޙީ ދާއިރާގެ ޚިދުމަތްތެރިންގެ ބުރަ މަސައްކަތުން ދަރިވަރުންނާއި ޓީޗަރުންނާއި އަދި ބެލެނިވެރިންގެ އުއްމީދުތަކަށް މިއަދު ދިރުން ގެނެސްދީފި ކަމަށެވެ.

އަދި މިއަދު ފެނިގެން މިދަނީ، ސިއްޙީދާއިރާގެ ޚިދްމަތްތެރިންނާ ރައްޔިތުން ގުޅިގެން ކޮވިޑްގެ ވަބާއިން މިންޖުވުމަށް ކުރި ބުރަމަސައްކަތުގެ ނަތީޖާ ކަމަށް މޫސަ ވިދާޅުވިއެވެ. އަދި މިއީ ރައީސް ޞާލިޙާއި ސިއްޙީ ދާއިރާގެ ކުޅަދާނަކަން ކަމަށްވެސް މޫސަ ވަނީ ވިދާޅުވެފައެވެ.

ދިރާސީ އާއަހަރަކަށް މަރްހަބާ! ދަރިވަރުންނާ ޓީޗަރުންނަށް އަދި ބެލެނިވެރިންގެ އުއްމީދުތަކަށް ދިރުންގެނެސްދެއްވި ސިއްޙީދާއިރާގެ ޚިދްމަތްތެރިންނާ ރައްޔަތުން ގުޅިގެން ކޮވިޑްގެވަބާއިން މިންޖުވުމަށް@ibusolih ކޮށްދެއްވި ބުރަމަސައްކަތުގެ ނަތީޖާ މިއަދު މިފެންނަނީ ޝުކުރިއްޔާ

— Moosa Maniku (Reeko) (@ReekoMoosa) August 10, 2021

92،000 އަށްވުރެ ގިނަ ދަރިވަރުންނާއެކު މިއަހަރުގެ ދިރާސީ އަހަރު މިއަދު ފަށާފައިވާއިރު، ރައީސުލްޖުމްހޫރިއްޔާ މިއަދު ވަނީ އައު ޢާންމު ޙާލަތާއެކު ކުރިއަށް ދިޔުމުގައި ސަރުކާރުން މިހާރު ފަށާފައިވާ ކޮވިޑް ވެކްސިން ޖެހުމުގެ ޕްރޮގްރާމަށް ހުރިހާ އެންމެންގެ އެއްބާރުލުން ބޭނުންވާކަމުގައި ވިދާޅުވެފައެވެ. އަދި، އުމުރުން 12 އަހަރާއި 17 އަހަރާ ދެމެދުގެ ހުރިހާ ކުދިންނަށް، ކޮވިޑް ވެކްސިން ޖެހުމުގެ ޚާއްޞަ ޕްރޮގްރާމެއް ވަރަށް އަވަހަށް ފެށުމަށް ތައްޔާރުވަމުން އަންނަކަމަށާއި، ސަރުކާރުގެ މިހާރުގެ އަމާޒަކީ މި މަސް ނިމުމުގެ ކުރިން، ހުރިހާ ކުދިންނަށްވެސް ކޮވިޑް ވެކްސިންގެ ފުރަތަމަ ޑޯޒް ޖަހައި ނިންމުން ކަމުގައި އެމަނިކުފާނު ވިދާޅުވިއެވެ.

2021 ވަނަ އަހަރުގެ ދިރާސީ އަހަރު މިއަދު ފަށާފައިވާއިރު މިހާތަނަށް 96 އިންސައްތަ ޓީޗަރުން ވެކްސިންގެ ފުރަތަމަ ޑޯޒް ފުރިހަމަ ކޮށްފައިވާ ކަމަށާއި ގިނަ އަދަދެއްގެ ޓީޗަރުން ދެވަނަ ޑޯޒްވެސް ފުރިހަމަ ކޮށްފައިވާ ކަމަށް އެޑިއުކޭޝަން މިނިސްޓްރީން ހާމަކޮށްފައިވެއެވެ.