އެސް.އެމް.އީ ލޯނުތައް އަނބުރާދެއްކުން ހަ މަސްދުވަހަށް ފަސްކުރުމަށް އިކޮނޮމިކް މިނިސްޓްރީ އިން ނިންމަވައިފިއެވެ.

އެސް.އެމް.އީ ޑިވެލޮޕްމަންޓް ފައިނޭންސް ކޯޕަރޭޝަނުން މިއަދު ކުރައްވާފައިވާ ޓްވީޓެއްގައި ވަނީ ކޯވިޑް-19 އާއި ގުޅިގެން، އެންމެ ކުދި، އަދި މެދު ފަންތީގެ ވިޔަފާރިތަކަށް އެހީތެރިވުމަށް އެސްޑީއެފްސީ އިން ދޫކޮށްފައިވާ ލޯނުތަކާއި، އޭގެ އިންޓްރެސްޓް އަނބުރާ ދެއްކުން 6 މަސްދުވަހަށް ފަސްކުރަން ނިންމާފައިވާ ކަމަށެވެ. އަދި މި 6 މަސްދުވަހުގެ އިންޓްރެސްޓް ރޭޓް %4 އަށް ކުޑަކުރެވިފައިވާ ކަމަށްވެސް މި ޓްވީޓްގައި ވެއެވެ.

މުޅި ދުނިޔެއަށް ކުރިމަތިވެފައިވާ ކޯވިޑް-19 ނުވަތަ ކޮރޯނާ ވައިރަސްގެ ނުރައްކާތެރިކަން ބޮޑުވެފައިވާ މި ދަނޑިވަޅުގައި، ޤައުމުތަކުގެ އިޤްތިޞާދަށް ވަނީ ބޮޑު ހީނަރުކަމެއް ކުރިމަތިވެފައެވެ. ދުނިޔޭގެ ގިނަ ޤައުމުތައް ލޮކްޑައުން ޙާލަތަށް ގޮސްފައިވާއިރު، މި އަޑިގަނޑުން އަރައިގަތުމަށް ދިގު މުއްދަތެއް ހޭދަވާނެ ކަމަށް އިޤްތިޞާދީ މާހިރުން ލަފާކުރައްވައެވެ.