ރިޒޯޓުތަކުގައި ޤާއިމުކޮށްފައިވާ ސްޕާތައް ފިޔަވައި ދިވެހިރާއްޖޭގައި ހިންގާ އެހެނިހެން ސްޕާތައް ބަންދު ކުރުމަށް ޑިރެކްޓަރ ޖެނެރަލް އޮފް ޕަބްލިކް ހެލްތު އަންގަވައިފިއެވެ.

ޑިރެކްޓަރ ޖެނެރަލް މައިމޫނާ އަބޫބަކުރު ނެރުއްވި އެންގުމެއްގައި ވިދާޅުވެފައިވަނީ މިރޭ 00:00 އިން ފެށިގެން ވަކިގޮތެއް އަންގަންދެން ރިޒޯޓުތަކުގައި ޤާއިމުކޮށްފައިވާ ސްޕާތައް ފިޔަވައި ދިވެހިރާއްޖޭގައި ހިންގާ އެހެނިހެން ސްޕާތައް ބަންދު ކުރުމަށް އަންގަވާ ކަމަށެވެ. މީގެ ތެރޭގައި ސެލޫންތަކުގައި ހިންގާ ސްޕާތައްވެސް ހިމެނޭކަމަށް އެ އެންގެވުމުގައި ވެއެވެ.

ރާއްޖެއިން މިއަދާ ހަމައަށް ކޯވިޑް-19 އަށް ޕޮޒިޓިވްވި 13 މީހުންގެ ތެރޭގައި ހިމެނެނީ އިޓަލީ ވިލާތުން އައި ނުވަ މީހަކާއި އިނގިރޭސި ވިލާތުގެ މީހަކާއި ތުރުކީ ވިލާތުގެ މީހަކާއި ޖަރުމަން ވިލާތުގެ މީހަކާއި ދެކުނު އެފްރިކާގެ މީހެކެވެ. މީގެތެރޭގައި ހިމެނެނީ ހަތް އަންހެނުންނާއި ހަ ފިރިހެނުންނެވެ.