ކޮރޯނާ ވައިރަސް ކޮންޓްރޯލް ކުރުމަށް ސަރުކާރުން އަޅަމުން ގެންދާ ފިޔަވަޅު ތަކުގެ ތެރޭގައި ހިމެނިގެން މާދަމާރޭ ނުވަތަ ހޮނިހިރު ދުވަހުގެރޭގެ 00:00 އިން ފެށިގެން މާލެއާއި މާލެ ސަރަހައްދުގައި ހިމެނޭ ހުޅުމާލެއާއި ވިލިނގިލީގައި ހިންގާ ސައި ހޮޓާ، ކެފޭ، ރެސްޓޯރެންޓް ފަދަ ކެއިން ބުއިމުގެ ޚިދުމަތްދޭ ތަންތަން ބަންދު ކުރަން އަންގައިފިއެވެ.

ވިޔަފާރިއާއި އިޤްތިޞާދާބެހޭ ވަޒީރު ފައްޔާޒް އިސްމާއީލް ދާދިދެންމެ ކުރެއްވި ޓްވީޓެއްގައި ވަނީ މިފަދަ ތަންތަނަށް ހުޅުވައިގެން ޚިދުމަތް ދިނުން ބަންދުވި ނަމަވެސް ޓޭކް އަވޭ ނުވަތަ ކާއެއްޗެހި ގެއަށްގެންދެވޭނެ ކަމަށެވެ. މިކަމާ ބެހޭ އިތުރު ތަފުސީލުތައް އެޗްޕީއޭއިން އާންމު ކުރައްވާނެ ކަމަށް ވެސް މިނިސްޓަރ ވިދާޅުވެފައިވެއެވެ.