ސިޔާސީ ދަހިވެތިކަމުގައި އަވައްޓެރިންނާމެދު އޮތް ގުޅުން ހީނަރުވާ އަމަލުތައް ނުކުރުމަށް މޯލްޑިވްސް ރިފޯމް މޫވްމަންޓް، އެމްއާރުއެމުން ގޮވާލައިފިއެވެ.

ދިވެހިރާއްޖޭގެ ޤައުމީ އެއްބައިވަންތަކަމުގެ ދުވަހުގެ މުނާސަބަތުގައި އެމްއާރުއެމުން ނެރެފައިވާ ބަޔާނުގައި ބުނެފައިވަނީ ސުނާމީ ކާރިސާއަކީ އަވައްޓެރި ޤައުމުތަކާއިއެކު އޮތް ގުޅުމާއި، އެ ގުޅުން ހީނަރު ވިޔަނުދީ ދެމެހެއްޓުމުގެ މުހިއްމުކަން ހާމަވެގެންދިޔަ ގިނަ ފަހަރުތަކުގެ ތެރެއިން އެއް ފަހަރު ކަމަށެވެ. އެހެންކަމުން ސިޔާސީ ދަހިވެތިކަމުގައި އަވައްޓެރި ޤައުމުތަކާއިމެދު ނަފުރަތު އުފައްދައި އެޤައުމުތަކާއި އެކު އޮތް ގުޅުން ހީނަރުވާފަދަ ނޭއްގާނީ އަމަލުތައް ނުކުރުމަށް ދިވެހި އެންމެހައި ރައްޔިތުންނަށް އެމްއާރުއެމުން ވަނީ ގޮވާލާފައެވެ.

މީގެ އިތުރުން ދިވެހިރާއްޖޭގެ ތަރައްޤީގެ މުހިއްމު ހިއްސާދާރުންތަކެއް ކަމަށްވާ ބިދޭސީ މަސައްކަތްތެރިންނަށް އިޙުތިރާމްކޮށް، އިސްލާމްދީން ދަސްކޮށްދީފައިވާ ރިވެތި އުޞޫލުތަކުގެ ތެރެއިން، އަޚުވަންތަކަމާއި އޯގާތެރިކަމާއިއެކު އެ މީހުންނާއިމެދު އަމަލުތައް ބެހެއްޓުމަށްވެސް އެޕާޓީންވަނީ ދިވެހި ރައްޔިތުންނަށް އިލްތިމާސް ކޮށްފައެވެ.

"ސުނާމީ ކާރިސާ ފަދަ ކޮންމެ ދަނޑިވަޅެއްގައި، ފަސްޖެހުމެއްނެތި އަވައްޓެރި ޤައުމުތަކުންނާއި ބައިނަލްއަޤުވާމީ މުޖުތަމައުން ދިވެހިރާއްޖެއަށް ފޯރުކޮށްދޭ އެހީތެރިކަން ބަލައިގަނެ، މި ޕާޓީއިން އެ ފަރާތްތަކަށް މިފުރުޞަތުގައި ޝުކުރު ދަންނަވަމެވެ." އެމްއާރުއެމްގެ ބަޔާނުގައިވެއެވެ.

އެމްއާރުއެމްގެ ބަޔާނުގައި ސުނާމީ ކާރިސާގެ ނާޒުކު ދަނޑިވަޅުގައި ދިވެހި ލޮބުވެތި ރައްޔިތުން އިސްކޮށްފައިވަނީ ޤައުމީ މަސްލަޙަތާއި ޤައުމީ އެއްބައިވަންތަކަން ކަމަށާއި ޤައުމަށް ދިމާވާ މިފަދަ ކޮންމެ ދަތި އުނދަގޫ އަދި ހިތާމަވެރި ދަނޑިވަޅެއްގައި ޤައުމީ މަސްލަހަތު އިސްކޮށް، ދިވެހި ކޮންމެ ފަރުދަކު ވެސް މަސައްކަތް ކުރުމަކީ ކޮންމެހެން ކުރަން ޖެހޭނެ ކަމެއްކަން ފާހަގަކޮށްފައިވެއެވެ.

އަދި ޤައުމަށް ދިމާވާ ބޮޑެތި ކަންތައްތަކުގައި ސިޔާސީ ފިކުރުތަކާއި ޚިޔާލު ތަފާތުވުންތައް އެއްފަރާތްކޮށް ސަރުކާރާއި ރައްޔިތުންގެ އެންމެން އެއްބައެއްގެ ގޮތުގައި މަސައްކަތް ކުރުމުގެ ބޭނުންތެރިކަން ސުނާމީ ކާރިސާއިން އެނގިގެން ގޮސްފައިވާކަމަށްވެސް އެމްއާރުއެމްގެ ބަޔާނުގައިވެއެވެ.