ކޯވިޑް-19: އާއި ގުޅިގެން ދިވެހި ސަރުކާރާއި، ހެލްތް ޕްރޮޓެކްޝަން އޭޖެންސީ އާއި، ދިވެހިރާއްޖޭގެ އެންމެހާ ޑޮކްޓަރުންނާއި، ނަރުހުން ކުރައްވަމުން ގެންދަވާ ބުރަ މަސައްކަތްތައް ފާހަގަ ކުރައްވައި ރައްޔިތުން މަޖިލީހުގެ ރައީސް، ރައީސް މުޙައްމަދު ނަޝީދު އެފަރާތްތަކަށް ޝުކުރު އަދާކުރައްވައިފިއެވެ.

އެ މަނިކުފާން މިރޭ ކުރެއްވި ޓްވީޓެއްގައި، ކޯވިޑް-19 އަށް ރާއްޖެއިން ފައްސިވި ފަރާތްތަކުގެ ތެރެއިން މުޅިން ރަނގަޅުވެފައިވާ ކަމަށް ސަރުކާރުން މިރޭ އިއުލާނުކުރި ފަރާތްތަކަށް އެހީތެރިވެ ދެއްވި އެންމެހާ ޑޮކްޓަރުންނާއި، ނަރުހުންނާއި، ސަރުކާރުގެ އިދާރާތަކަށް ޝުކުރު އަދާކުރައްވާކަން ހާމަކުރައްވާފައިވެއެވެ.

ރާއްޖެއިން ކޯވިޑް-19 އަށް ފައްސިވި ފަރާތްތަކުގެ ތެރެއިން، ދެ މީހަކު މުޅިން ރިކަވަރ ވެފައިވާ ކަމަށް ސަރުކާރުން މިރޭ އިއުލާނުކުރައްވާފައިވާއިރު، އެފަރާތްތަކަށް ފަރުވާދިނުމުގައި ޝާމިލްވި އެންމެހާ ފަރާތްތަކަށް ހިތްވަރުދީ، ތަޢުރީފްގެ މެސެޖްތައް ގިނަ ބަޔަކު ދަނީ މީސްމީޑިއާގައި ހިއްސާކުރަމުންނެވެ.