ހުސްވި ހަފުތާގެ ތެރޭގައި ކ. ގާފަރު ގެސްޓް ހައުސްއެއްގެ ތެރޭގައި އަމިއްލައަށް މަރުވެފައި އޮތް ޒުވާން އަންހެންކުއްޖަކު ވަނީ ފެނިފައެވެ. އއ. ބޮޑުފުޅަދޫ ފަރުދާބަގީޗާގެ ނާޖިލާ، 27އ، މަރުވެފައި އޮއްވާ ފެނުނީ އޭނާގެ ޚަބަރެއް ނުވެގެން ބެލިއިރު އޭނާ ހުރި ގެސްޓް ހައުސްގެ ކޮޓަރީގެ ފާޚާނާ ތެރޭގައި ވެއްޓިފައި އޮއްވައެވެ. މަރުވިތާ އެއްދުވަސް ފަހުން ނާޖިލާގެ ހަށިގަނޑު ފެނުނުއިރު އޭނާގެ އަތުން ދޫވެފައި އޮތް ވަޅިއެއް ގެސްޓު ހައުސްގެ ފާޚާނާ ތެރެއިން ފެނުނެވެ.

ނާޖިލާ ފެނުނުއިރު ކަރުގައި ޅިޔައަޅާލާފައިވާކަހަލަ ގޮތަކަށް ވަޅިން ދީފައިވާ ބޮޑު ޒަހަމެއް ފެންނަން ހުއްޓެވެެ. ފުލުހުންގެ އިދާރާއިން ބުނީ އެ މަރާ ގުޅޭ ތަގުގީގު އަދި މުޅިން ނުނިމޭ ކަމަށާއި އެކަމަކު އެ މަރުގައި އިތުރު އެއްވެސް މީހެއްގެ ދައުރެއް އޮތްކަން މިހާތަނަށް ތަހުގީގަށް ފާހަގަކުރެވިފައި ނެތް ކަމަށެވެ. މިމަރާ ގުޅޭ މާ ބޮޑު މައުލޫމާތެއް ފުލުހުން ހާމައެއް ނުކުރެއެެވެ.

އެހެން ނަމަވެސް ނާޖިލާގެ މަރަށް ދެ ހަފުތާއަށް ވުރެ ގިނަ ދުވަސްވި ފަހުން އެ މަރާއި ގުޅިގެން ފަރުދާގެ ފުރަގަހުގައިވާ ފިއްކަނޑައިގެންދާ ވަރުގެ އަދި ގައިން ހީބިހިނަގައިގެންދާ ވަރުގެ ވަރަށް ހިތާމަވެރި ހިތްދަތި ބޮޑެތި ވާހަކަތަކެއް މިވަނީ ފެންމަތިވެފައެވެ. ނަމަވެސް މިއީ މިހާތަނަށް މީޑިޔާއަށް ތިލަވެފައިވާ ވާހަކަ ތަކެއް ނޫނެވެ. އެ ވާހަކަތައް "ރަސްއޮންލައިން" އަށް އަސަރާއެކު ކިޔައިދިނީ ނާޖިލާގެ ބައްޕައެެވެ. އެހެންކަމުން އަޅުގަނޑުމެން "ރަސް އޮންލައިން"ގެ ކިޔުންތެރިންނާ މިވާހަކަތައް ހިއްސާ މިކުރަނީ މަރުހޫމް ނާޖިލާގެ ބައްޕަގެ ހުއްދައާއި އެކުގައެވެ. ބައްޕަ އެދޭ ފަދައިން އެމަރުހޫމުގެ މަރަށް އިންސާފު ހޯދައިދިނުމުގައި ބައިވެރިވުމުގެ ނިޔަތުގައެވެ. އަދި މި ކުޑަކުޑަ މުޖުތަމަޢުން އެފަދަ ނާތަހުޒީބީ އަދި ނުރައްކާތެރި ލާއިންސާނީ އަމަލުތައް ހުއްޓުވުމުގައި މުޖުތަމަޢުގެ ހޭލުންތެރިކަން އިތުރުކުރުމުގައި އެހީތެރިވެ ދިނުމުގެ ހެއު ނިޔަތުގައެވެ.

މީގެ އަހަރުތަކެއް ކުރިން ނާޖިލާގެ ބައްޕައާއި މަންމަގެ ކައިވެނި ވަނީ ރޫޅިފައެވެ. ނާޖިލާ ބައްޕަ މިހާރު އުޅެނީ އެހެން މީހަކާއި އިނދެގެން ރާއްޖެއިން ބޭރުގައެވެ. ރާއްޖެއިން ބޭރުން ތައުލީމް ހާސިލްކޮށްފައިވާ ނާޖިލާ އަކީ ވަރަށް ވިސްނުން ތޫނު ކިޔެވުމަށް ވަރަށް މޮޅުކުއްޖެކެެވެ. އަޚުލާގު ރަނގަޅު ގޭތެރެެއިން ރަނގަޅު ތަރުބިއްޔަތު ލިބިގެން ބޮޑުވަމުން އައި ނާޖިލާ އަކީ މިޒަމާނުގެ ކުދިން އުޅޭގޮތަށް މާބޮޑަށް ބޭރުތެރެއަށް ނިކުމެ އުޅުނު ކުއްޖެއް ނޫނެވެ. އުފަލާ ހިތްހަމަޖެހުމުގައި ދުވަސްތައް ފާއިތުވަމުންދަނިކޮށް ނާޖިލާގެ ހަޔާތަށް ބަނަ ކަޅުވިލާގަނޑެެއްގެ ހިޔަނި އެޅުނީ އުމުރުން އެންމެ 17 އަހަރުގައެވެ.

ނާޖިލާގެ ބައްޕަ ކުއްޔަށް ހިފާފައިވާ އެގޭގައި އޭނާ ދިރުއެޅުމުންދިޔައީ މަންމަ އާއި އެކުގައެވެ. އެގޭގައި ދެން އުޅެނީ މަންމަ އާއި އެއްބަނޑު އަންހެން ކޮއްކޮ (ނާޖިލާގެ ޅިޔަންބެގެ އަންހެނުން) އެވެ. ދައްތަ އާއި މަންމަ ގޭގައި ނޫޅޭ ވަގުތެއްގައި ދަނޑިވަޅު ބަލައި ގޭގައި އެކަނިވި ވަގުތުގެ ބޭނުން ހިފައި ނާޖިލާގެ އިއްފަތްތެރިކަން ފޭރިގަނެ ރޭޕްކުރީ ޅިޔަނެވެ. ނާޖިލާ އެކަމާ ގަދަހެދުމުން މޫނު މަތީގައި ބާލީސް އަޅައި އެ ހަޑިމުޑުދާރު ޖަރީމާ ހިންގިއިރު ރަހުމެއް ހަމްދަރުދީގެ ކަންފުޅެެއް ވެސް ނެތެވެ.

ނާޖިލާއަށް ރައްކާތެރިކަމާއި ހިމާޔަތް ދޭންޖެހޭ މަގާމެއްގައި ހުރި ޅިޔަނުގެ އަނިޔާވެރި ވަކިތަކުގެ ތެރޭގައި ހައްޔަރުވެ ޝިކާރަކޮށްލީ އެ "ފަކީރު" ރޮއި އާދޭސްކޮށްކޮށް އޮއްވައެވެ. އެވަރުންވެސް އަދި ޅިޔަނުގެ ހިތެއް ނުފުރުނެވެެ. އެންމެ ފަހުން ނާޖިލާގެ ބަރަހާނާ ފޮޓޯތައް ނަގައި އެވާހަކަ އެއްވެސް މީހެއް ކައިރީގައި ބުނެފިނަމަ އެ ފޮޓޯތަައް އިންޓަނެޓަށް އުކާލައި ލީކު ކޮށްލާނެ ކަމަށް ބުނެ ބިރު ދައްކައި އިންޒާރު ވެސް ދިނީއެވެ.

އެ ބިރުވެރި ހާދިސާ އާއިއެކު ނާޖިލާގެ ހަޔާތް އެފުށް މިފުށައް ޖެހުނެވެ. ދިރިއުޅުމުގެ މަތިން މުޅިން ފޫހިވެ މާޔޫސްވިއެވެ. މޮޅަށް ކިޔަވަމުން އައި ނާޖިލާގެ ކިޔެވުންް ވެސް މުޅިން ހަލާކުވީއެވެެ. ޅިޔަނުގެ އަނިޔާވެރި ރަހުމުކުޑަ ލާއިންސާނީ އަމަލުތައް ކުރިމަތިން އަބަދު ސިފަވަމުންދާތީ ނާޖިލާ ނަފުސާނީ ގޮތުން ބަލިކަށިވެ ދިރިއުޅުމަށް އުދަނގޫވާން ފެށީއެެވެ. ރަނގަޅު މުސްތަގުބަލެއްް ބިނާކުރުމަށް ފޮނި ހުވަފެންތަކެއް ދެކެމުން އައި ނާޖިލާގެ ހަޔާތް ވިއްސިވިހާލިވެ ދެކެމުން އައި ފޮނި ހުވަފެންތައް ބިލާހަކަށް ވެގެންދިޔައީ އެ ހިތްދަތި ހާދިސާއަށްފަހުއެވެެ.

ނާޖިލާގެ ހަޔާތުގެ ހަތަރު އުދަރެސް ފެނުޖެހެމުންދިޔަ އިރުވެސް އެ އަނިޔާއަށް ކެތްކުރެވޭތޯ އޭނާ މަސައްކަތް ކުރިއެެވެ. ނާޖިލާ އެ ވާހަކަތައް ސިއްރުކޮށް ދިރިއުޅުމައިގެން ކުރިއަށް ދެވޭތޯ ލައްކަ ހިތްވަރުވެސް ކުރިއެވެެ. އެެހެން ނަމަވެސް އެންމެފަހުން ނާޖިލާގެ ކެތްތެެރިކަން ވެސް "ކޮޅުންލީ" އެެވެެ. ކޮންމެ ގޮތެއްވި ނަމަވެސް ބައްޕަ އާއި ބައްދަލުކޮށް އެހާތަނަށް ސިއްރު ކުރަމުން އައި އެވާހަކަތައް ކިޔައިދިނުމަށް ނާޖިލާ ނިއްމީ އެ ހިސާބުންނެވެ. އެއީ މީގެ އަހަރެއްްހާ ދުވަސްކުރިއެވެ.

އެއްދުވަހަކު ނާޖިލާ އޭނާގެ ބައްޕައަށް ގުޅައި ވަރަށް ބޮޑު ވާހަކައެއް ބުނަން ބޭނުންވާތީ އަވަހަށް ބައްދަލުކޮށްލަން އެދުނެެވެ. ގެއަށް އައުމުން ބައްްޕަ އާއި ބައްދަލުވުމާއެކު ނާޖިލާގެ އެ ހިތްދަތި އުދާސްތަކަށް ކެތްނުކުރެވި ހިތް ފަޅައިގެން ގޮސް ރޯންފެށިއެެވެ. ނާޖިލާ ބައްޕަގެ ގައިގާ ބައްދާލައިގެން ހިރެ ރޮމުން ގޮސްލަމުން ބުނީ ވަރަށް ބޮޑަށް ބަލިވެ އުޅޭ ވާހަކައެެވެ. ނާޖިލާގެ އަމަލުތައް ހުރި ގޮތުން ކޮންމެވެސް ބޮޑުކަމެއް ވެއްޖެ ކަމަށް ބައްޕައަށް ކުރެވުނު އިހުސާސާއެކު ވީ ކިހިނެއްތޯ ނާޖިލާގެ ބައްޕަ ސުވާލުކުރިއެވެެ.

ވެގެން އުޅޭގޮތް ނާޖިލާ ކިޔައިދޭން ފެށީ ދެނެވެ. އުމުރުން 17 އަހަރުގައި ޅިޔަނު އޭނާ ރޭޕްކޮށް ބަރަހާނާ ފޮޓޯ ނެގި ވާހަަކަ ވަރަށް ލަދުވެތިކަމާއެކު އަސަރާއެކު ބައްޕައަށް ކިޔައިދިނެވެ. އެވާހަކަ އޭރު ސިއްރުކުރީ ކީއްވެތޯ ބައްޕަ ސުވާލުކުރުމުން ނާޖިލާ ބުނީ މަންމަގެ ފަރާތުން އެކަން އެންމެންނަށް ވެސް އެނގޭނެ ކަމަށެވެ. އެ ވާހަކަ ނުދައްކައި ސިއްރުކުރީ އާއިލާ ބަދުނާމުވެދާނެތީ މަންމަގެ އެދުމުގެ މަތިން ކަމަށް ނާޖިލާ ބުންޏެވެެ. އެކަން ހިނގިކަން ނާޖިލާގެ ޅިޔަނުގެ އަންހެނުން (މަންމަ ފަރާތު ބޮޑުދައިތަ) އަށް އެނގުމުން އެކައިވެނި ރޫލާލައި ޅިޔަނު ކައިރިން އޭނާ ވަރިވިއެވެ.

ނާޖިލާގެ ދައްތަ ހުރީ އެ މައްސަލައިގައި ބަޔާން ދޭން ވެސް ތައްޔާރަށެވެ. "ރަސްއޮންލައިން" އަށް މައުލޫމާތު ދެމުން ނާޖިލާގެ ބައްޕަ ބުނީ ނާޖިލާއަށް ދިމާވި ހިތާމަވެރި ހާދިސާ އަށްފަހު އޭނާ ނަފުސާނީ ގޮތުން ވަރަށް ބޮޑަށް ބަލިކަށިވި ކަމަށާއި، އެބަލިން އޭނާ ސަލާމަތްކުރުމަށް މަސައްކަތް ވެސް ފެށި ކަމަށެވެ. އެހެން ނަމަވެސް މިދިޔަ ދެ އަހަރު ރާއްޖެއިން ބޭރުގައި ހުންނަންޖެހި ކޮވިޑާއި ހެދި ރާއްޖެ ނާދެވުމުން ނާޖިލާއަށް ބޭނުންވާ ލޯތްބާއި އަޅާލުމާއި އެހީތެރިކަން ނުދެވުނު ކަމަށް ނާޖިލާގެ ބައްޕަ ބުންޏެވެ.

"ރާއްޖެ ނުދެވުނީމަ ނާޖިލާ އާއި ތަންކޮޅެއް ދުރުވެސް ވާނެތާ ދެއްތޮ. އެހެން ދިމާވުމުގެ ސަބަބުން އެ ބޭނުންވާ ވަރަށް އަޅުގަނޑަށް ކައިރިން ލޯބިވެސް ނުދެވުނު. އެ ބަލީގައި ގޮސް އޭނާ އެމަރުވީ، ދެން ރޭޕްކުރުން މީގެ މައްސަލައަކީ. ކުޑަކުއްޖަކު ރޭޕްކުރުމަކީ ކުށެއް ނޫންތޯ،" ރާއްޖެއިން ބޭރުގައި ހުރެ ފޯނުން "ރަސްއޮންލައިން" އަށް ދިން އިންޓަވިއުގައި ނާޖިލާގެ ބައްޕަ ކިޔައިދިނެވެ.

ނާޖިލާގެ ބައްޕަ ބުނާގޮތުން އެ ވާހަކަ ސިއްްރުކުރީ އޭނާގެ އެދުމުގެ މަތިންނެވެ. އޭނާ ދުނިޔޭގައި ހުއްޓާ އެމައްސަލަ ނުޖެއްސުމަށާއި، އޭރުން ނޫސްތަކުގެ ފަލަ ސުރުޚީއަށް އަރައި ދުނިޔޭގައި އުޅުމަށް ދަތިވެދާނެ ކަމަށް ނާޖިލާ ބުނި ކަމަށް ބައްޕަ ބުންޏެވެ. އެހެންކަމުން ނާޖިލާގެ އެދުމާއެކު އެކަމުގެ ތެދު ދޮގާއި ހަގީގަތާއި ހަމައަށް ރަނގަޅަށް މައުލޫމާތު ސާފުވަންދެން މައްސަލަ ނުޖައްސަން ބައްޕަ ނިއްމީއެވެެ. ނާޖިލާ މަރުވުމުގެ ކުރިން އެންމެ ފަހުން ބައްޕަ އާއި ބައްދަލުވި ދުވަހު "ދުނިޔޭގެ އަނެއް ފަރާތަށް ދާން ބޭނުންވާ" ކަމަށް ނާޖިލާ ބުނެފައިވެއެވެެ.

"ދެން އަޅުގަނޑު ބުނިން ދުނިޔޭގެ އަނެއް ފަރާތުގައި އުޅެފައި ނޫންހޭ ތިޔައީ، އެއީ އޭނާ ކެނެޑާގައި އުޅުނު ވާހަކަ އަޅުގަނޑު ބުނީ. ދެން ބުނީ އަދިވެސް ޖައްސާލަން ބޭނުމޭ އަޅުގަނޑު ބުނިން ތިކަމާއި ދޭތެރޭގައި ވިސްނާލާނަމޭ." އެންމެ ފަހުން ނާޖިލާއާއި ބައްދަލުވެ ދެކެވުނު ވާހަަކަތައް "ރަސްއޮންލައިން" އާއި ހިއްސާ ކުރަމުން ނާޖިލާގެ ބައްޕަ ބުނެޏެވެ.

ނާޖިލާގެ މަންމަގެ ތިން ކުދިން ތިބެއެވެ. އެއީ ފިރިހެންކުއްޖަކާއި ދެ އަންހެން ކުދިންނެވެ. ނާޖިލާގެ ބައްޕަ ބުނީ އޭނާގެ މަރަށް އިންސާފު ހޯދާނެ ކަމަށާއި އެކަމުގައި އަޅަންޖެހޭ ހުރިހާ ފިޔަވަޅެއް އަޅާނެ ކަމަށެވެ. ކިތަންމެ ގިނަ ދުވަހެއް ވިނަމަވެސް އެކަން ކުރި ޅިޔަނު ގާނޫނުގެ ކުރިމައްޗަށް ގެންނާނެ ކަމަށް ނާޖިލާގެ ބައްޕަ ބުންޏެެވެ.

ރޭޕް ކުރި ކަމަށް ތުހުމަތުކުރާ އޭނާގެ ޅިޔަނު އަދި ހައްޔަރުކޮށްފައެއް ނުވެއެވެ. ނާޖިލާ އަމިއްލައަށް މަރުވި ނަމަވެސް އެމަރުގެ ފަހަތުގައި ފޮރުވިފައިވާ ސަބަބުތައް ހޯދުމަށް ތަހުގީގުގެ އެންމެ ފުނަށް ވާސިލްވުމަކީ ވަރަށް މުހިންމު ކަމެކެވެ. މިފަދަ ބޮޑު ތުހުމަތެއް ޅިޔަނުގެ މައްޗަށް ކުރާއިރު އެކަމުގެ ހަގީގަތް ފުލުހުން ހާމަކުރަންޖެހެއެވެ. މިމައްސަލައިގައި ބަޔާން ދޭން ތައްޔާރަށް ތިބި ކަމަށް އާއިލާއިން ބުނާއިރު މިމައްސަލައިގެ ތަހުގީގަށް އެ ފަރާތްތަކުގެ ބަސް ހޯދަންޖެހެއެވެ. އެހެން ނޫނީ ނާޖިލާގެ މަރަށް އިންސާފު ހޯދައިދެވުނު ކަމަކަށް ނުވާނެއެވެެ.

ނާޖިލާ މިއަދު ދުނިޔޭގައި ނެތް ނަމަވެސް ޅިޔަނު އޭނާ ރޭޕްކުރި ކަމަށް ބަައްޕައާއި އާއިލާއިން ކުރާ ތުހުމަތުގެ ހަގީގަތް ސާފުވާންޖެހެއެވެ. ޅިޔަނު އެ ނުބައި ޖަރީމާ ހިންގައިފައިވާނަމަ އޭނާ އަށް ހަައްގު އަދަބު ލިބެންޖެހޭނެއެވެެ. ޢެހެން ނޫނީ އެއީ ނާޖިލާއަށް ކުރެވޭ ވަރަށް ބޮޑު ބޭއިންސާފެކެެވެ.