ކޯވިޑް-19 ގެ ސަބަބުން ވަޒީފާގެ ހާލަތަށް ބަދަލެއް އައިސްފައިވާނަމަ ޖޮބް ސެންޓަރަށް ރިޕޯޓް ކުރުމަށް މިނިސްޓްރީ އޮފް އިކޮނޮމިކް ޑިވެލޮޕްމަންޓުން އިލްތިމާސް ކޮށްފިއެވެ.

އެ މިނިސްޓްރީން މިރޭ ކުރި އިޢުލާނެއްގައި ވަނީ، ކޯވިޑް-19 ގެ ސަބަބުން ވިޔަފާރިތަކާއި، ރާއްޖޭގައި ވަޒީފާ އަދާކުރަމުންދާ ފަރާތްތަކަށް ދަތިތަކެއް ކުރިމަތިވެފައިވާކަން ފާހަގަ ކުރެވިފައިވާ ކަމަށެވެ. މިގޮތުން ކޯވިޑް-19 އާ ގުޅިގެން ވަޒީފާއިން ވަކިކުރެވިފައިވާނަމަ، ނުވަތަ ވަޒީފާގެ ޙާލަތަށް އެއްވެސް ބަދަލެއް އައިސްފައިވާނަމަ، އެ މިނިސްޓްރީގެ ޖޮބް ސެންޓަރަށް ރިޕޯޓް ކުރުމަށާއި، ކަމާގުޅޭ ލިޔުންތައްވެސް ޙިއްސާ ކުރުމަށް އެދިފައިވެއެވެ.

ރާއްޖޭގެ އިޤްތިޞާދަށް ކުރިމަތިވެފައިވާ ހީނަރުކަމުގެ ސަބަބުން، ވަޒީފާތައް ދެމެހެއްޓުމުގެ މަޤްސަދުގައި ވިޔަފާރިތަކަށް ކޭޝް-ފްލޯ ފައިނޭންސިންގ ސްކީމެއް ފަހިކޮށް ދިނުމާއި އެހެނިހެން ފިޔަވަޅުތައް ސަރުކާރުން އަޅަމުންދާކަން މިނިސްޓްރީން ފާހަގަކޮށްފައި ވެއެވެ.