ދިވެހި އަދަބިއްޔާތަށް ގިނަ ޚިދުމަތްތަކެއް ކޮށްދެއްވި އާމިނަތު އައްބާސް އަވަހާރަވެއްޖެއެވެ.

ޢުމުރުފުޅުން 68 އަހަރުގައި އާމިނަތު އައްބާސް އަވަހާރަވީ ކެންސަރު ބަލީގެ އާލާސްކަންފުޅަކަށް ފަރުވާ ހޯއްދަމުން ގެންދަވަނިކޮށް އޭޑީކޭ ހޮސްޕިޓަލުގައި މިއަދު ހެނދުނުގެ ވަގުތެއްގައެވެ.

ކުރީގެ މަޝްހޫރު ޅެންވެރިޔާ، ގ.ޑޭޒީމާގޭ، އާމިނަތު ފާއިޒާގެ ދަރިކަނބަލެއް ކަމަށްވާ އާމިނަތު އައްބާސް ވަނީ ޅެން ހެއްދެވުމުގެ އިތުރަށް ޅެންވެރިކަން ދަސްކޮށްދެއްވުމަށާއި ޅެންވެރިކަމުގެ މުބާރާތްތަކުގައި ފަނޑިޔާރުކަންވެސް ކުރަށްވާފައެވެ.

ދިވެހި އަދަބިއްޔާތަށް ގިނަ ޚިދުމަތްތަކެއް ކޮށްދެއްވުމުގެ އިތުރުން އެކަމަނާ ވަނީ ބައެއް ފޮތްތައްވެސް ލިޔުއްވާފައެވެ. އެގޮތުން ކުޑަކުދީންގެ ޅެންފޮތާއި، ޔޫސުފް މުޙައްމަދުފުޅުގެ ޅެންތަކާއި، ބަރާބަރު ބާރަ 1، ނޭވަޔަށް އުނދަގޫކުރުމުގެ ބައްޔަށް ލުއިކަމެއްފަދަ ފޮތްތައް ވަނީ ލިޔުއްވާފައެވެ.

އާމިނަތު ޢައްބާސްއަށް ލިބިފައިވާ ކާމިޔާބީތަކުގެ ތެރޭގައި، ކުޑަކުދިންގެ ޅެންފޮތް އެކުލަވައިލުމުގެ މުބާރާތުން 1 ވަނަ ލިބިފައިވުމާއި، އިސްލާމީ ކަންތައްތަކާބެހޭ އެންމެމަތީ މަޖިލީހުން 1996 ވަނަ އަހަރު ބޭއްވެވި ދީނީ ޅެންހެދުމުގެ މުބާރާތުން 1 ވަނަ ލިބިފައިވުމާއި، ގައުމީ ޅެންހެދުމުގެ މުބާރާތްތަކުން މަތީ ވަނަތައް ހާސިލުކުރެއްވުން ހިމެނެއެވެ. މީގެ އިތުރުން ދީނީ ޅެން ހެދުމުގެ މުބާރާތްތަކުންވެސް އެކަމަނާ ވަނީ ވަނަތަކެއް ހާސިލްކޮށްފައެވެ.