ސްކޫލް ބަންދުގައި ރާއްޖެއިން ބޭރުގެ އެކި ޤައުމުތަކަށް ދަތުރު ކުރުމުގައި ސަމާލުވުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ލަފާދީފިއެވެ.

އެޗްޕީއޭން މިއަދު ނެރުނު ބަޔާނެއްގައި ދުނިޔޭގައި ހަލުވި ކަމާއެކު ކޮރޯނާ ވައިރަސް ފެތުރެމުން ދާއިރު ކުރިއަށް އޮތް ސްކޫލް ބަންދުގައި ރާއްޖެއިން ބޭރަށް ދަތުރު ކުރުމުގައި ސަމާލުވުމަށާއި ކޮންމެހެން ކުރަން ޖެހޭ ދަތުރެއް ފިޔަވައި ނުކުރުމަށް އެދިފައިވެއެވެ.

މީގެއިތުރުން ދަތުރު ކުރުމުގެ ކުރިންނާއި، ދަތުރު މަތީގައާއި ދަތުރުން އެނބުރި އައުމަށްފަހު އަމަލު ކުރަންޖެހޭ ކަންކަން ވެސް އެޗްޕީއޭގެ ބަޔާނުގައި ފާހަގަކޮށްފައި ވެއެވެ.

އެގޮތުން ދަތުރު ކުރާ ގައުމުގައި ބަލީގެ ހާލަތު ރަނގަޅަށް ދެނެގަތުމާއި، ބަލި ފެތުރޭ ގައުމުތަކަށް ދަތުރު ނުކުރުމާއި، ދުވަސްވީ މީހުންނާއި ދިގު މުއްދަތަށް ފަރުވާކުރާ ބަލިތަކުގެ މީހުން ކޮންމެހެން ކުރަންޖެހިގެން ނޫނީ މި ދުވަސްވަރު ދަތުރު ނުކުރުމަށާއި އަދި ދަތުރު ކުރާ ގައުުމުގެ ސަރުކާރުން، ބަލިން ރައްކާތެރިވުމަށް އެ ގައުމުގައި އަޅާފައިވާ ފިޔަވަޅުތަކާއި އިރުޝާދުތަކަށް އަހުލުވެރިވުމަށް އެޗްޕީއޭއިިން އިލްތިމާސްކުރެއެވެ.

މީގެއިތުރުން، ހުމާއި ކެއްސުމާއި ރޯގާގެ އަލާމާތްތައް ހުންނަ ފަރާތްތަކާ ގާތްވެ ނޫޅުމަށާއި، ގިނައިން ސައިބޯނި ލައިގެން އަތޮދޮވުމާއި ސެނިޓައިޒާ ބޭނުން ކުރުމަށާއި، މޫނާއި ލޮލާއި އަނގަ އަދި ނޭފަތުގައި އަތްނުލުމަށާއި، ކާބޯތަކެތީގެ ތެރެއިން، ސީފުޑް ރަނގަޅަށް ކައްކައިގެން ކެއުމަށާއި، ކޮންމެހެން ދާންޖެހިގެން ނޫނީ ސިއްހީ މަރުކަޒުތަކަށް ވެސް ދަތުރުމަތީގައި ނުދިއުމަށް ވެސް އެޗްޕީއޭ އިން ވަނީ އެދިފައެވެ.

ދަތުރުން އެނބުރި އައުމަށްފަހު އެނބުރި އަންނަތާ 14 ދުވަސްތެރޭގައި ހުން އައިސް ރޯގާ ޖެހުމާއި ކެއްސުން ފަދަ އަލާމާތެއް ފެނިއްޖެ ނަމަ ގޭގައި މަޑުކުރުން އަދި ހޮޓްލައިން 1676 އަށް ގުޅުމަށް އެޗްޕީއޭއިން އިލްތިމާސްކުރެއެވެ.