ކޯވިޑް-19 އާ ގުޅިގެން ކަރަންޓީން ކޮށްފައި ތިބި ބައެއް މީހުން އެހެން މީހުންނާ ބައްދަލުކުރާ މައްސަލަތަކެއް ފެންމަތިވެ، އެ މައްސަލަތައް ބަލަން ފަށައިފިއެވެ.

ކޯވިޑް-19 އާ ގުޅޭ އެންމެ ފަހުގެ މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން ސަރުކާރުގެ ތަރުޖަމާނު މަބްރޫކް އަޒީޒް ވިދާޅުވީ އެފަދަ ދެތިން މައްސަލައެއް ސަރުކާރުގެ ސަމާލުކަމަށް އައިސްފައިވާ ކަމަށާއި، އެކަމާ ގުޅިގެން އަޅަންޖެހޭ ފިޔަވަޅުތައް އަޅަން ފަށާފައިވާ ކަމަށެވެ.

މަބްރޫކް ވިދާޅުވީ ކަރަންޓީނުގައި ތިބޭ ފަރާތްތަކުގެ އަމަލުތައް ބަހައްޓަން ޖެހޭ ގޮތުގެ ގައިޑްލައިނެއް ދީފައިވާނެ ކަމަށާއި، ބޭރަށް ނުކުމެ އެހެން މީހުންނާ ބައްދަލުކޮށް ނޫޅެވޭނެ ކަމަށެވެ. އެހެންނަމަވެސް ކަރަންޓީނުކޮށްފައި ތިބި ބައެއް މީހުން، ކޮޓަރިން ބޭރަށް ގޮސް އެހެން މީހުންނާ ބައްދަލުކޮށް ފޮޓޯ ނެގުން ފަދަ ކަންކަން އަންނަނީ ކުރަމުންނެވެ.

މިއަދާހަމައަށް ކަރަންޓީނު ކޮށްފައި ތިބި ދެ ދިވެއްސަކު ވަނީ ކޯވިޑް-19 އަށް ޕޮޒިޓިވް ވެފައެވެ. އެއީ މި މަހުގެ 22 ވަނަ ދުވަހު އިނގިރޭސިވިލާތުން އެނބުރި ރާއްޖެ އައުމުން ހޮލިޑޭ އައިލެންޑް ރިސޯޓްގައި ކަރަންޓީނު ކޮށްފައިހުރި އުމުރުން 38 އަހަރުގެ ދިވެހި ފިރިހެނަކާއި، އިނގިރޭސިވިލާތުން އެނބުރި ރާއްޖެ އައުމުން ރޯޔަލް އައިލެންޑް ރިސޯޓްގައި ކަރަންޓީނުކޮށްފައިވާ ދިވެއްސެކެވެ.