ވަޒީފާދޭ ފަރާތްތަކުން ޤާނޫނާ ޚިލާފަށް މުވައްޒަފުންގެ ވަޒީފާއާމެދު ޢަމަލުކުރަމުން އަންނަކަން ފާހަގަކުރެވިފައިވާ ކަމުގައި ލޭބަރ ރިލޭޝަންސް އޮތޯރިޓީ އިން ބުނެފިއެވެ.

މިކަން ހާމކޮަށް ލޭބަރ ރިލޭޝަންސް އޮތޯރިޓީ ނެރެފައިވާ އިޢުލާނެއްަގައި، ކޯވިޑް-19 އާ ގުޅިގެން ވިޔަފާރިތަކަށް ކުރިމަތިވެފައިވާ މި ދަތި ޙާލަތުގައި، މުވައްޒަފުންގެ ޙައްޤުތައް ރައްކާތެރި ކޮށްދިނުމަށް ސަރުކާރުން ވިޔަފާރިތަކަށް އެކިއެކި ލުއިތައް ހަމަޖައްސައި ދެމުން ގެންދާކަން ފާހަގަކޮށްފައިވެއެވެ.

އެހެންކަމުން މިވަގުތު، މުވައްޒަފުންގެ މުސާރައާއި ޢިނާޔަތްތައް ކުޑަކުރުމާއި، ނޯޕޭލީވްގެ ގޮތުގައި މުވައްޒަފުން ފޮނުވާލުމާއި، ވަޒީފާއިން ވަކިކުރުން ފަދަ ކަންކަން ނުކުރުމަށް ވަޒީފާދޭ އެންމެހާ ފަރާތްތަކަށް އެ އޮތޯރިޓީއިން ވަނީ އިލްތިމާސް ކޮށްފައެވެ. އަދި ޤާނޫނާ ޤަވާއިދާއި ޚިލާފު އެއްވެސް ފިޔަވަޅެއް މުއައްޒަފުންނާމެދު ނޭޅުމަށާއި މުވައްޒަފުންގެ ވަޒީފާއާ ގުޅޭ ކަންކަމުގައި އެ އޮތޯރިޓީއާ މަޝްވަރާ ކުރުމަށްވެސް އެދިފައިވެއެވެ.

އަދި 01 މާރޗުން ފެށިގެން އެއްވެސް ފަރާތަކުން، އެއްވެސް މުވައްޒަފެއްގެ ވަޒީފާގެ ޙާލަތަށް ބަދަލެއް ގެނެސްފައިވާނަމަ އެކަން އެ އޮތޯރިޓީއަށް އެންގުމަށް އިލްތިމާސް ކޮށްފައިވެއެވެ.

ކޯވިޑް-19 އާއި ގުޅިގެން ރާއްޖެއަށް އިޤްތިޞާދީ ގޮތުން ކުރިމަތިވެފައިވާ ހީނަރުކަމުގެ ސަބަބުން ވިޔަފާރިތަކަށް ކުރާ އަސަރު ކުޑަކުރުމަށް ސަރުކާރުން އެކި ކަހަލަ ލުއިތަކެއް ހޯދައި ދެމުން ގެންދިއުމުގެ މައިގަނޑު މަޤުޞަދަކީވެސް މި ޑަނޑިވަޅުގައި މުވައްޒަގުންގެ ވަޒީފާތައް ދެމެހެއްޓުމަށް މަގުފަހިކޮށްދިނުމަށް ކަމުގައި ސަރުކަރުން ވަނީ ބުނެފައެވެ.