ވީޑިއޯ ކޮންފަރެންސް މެދުވެރިކޮށް ރައްޔިތުންގެ މަޖިލީހުގެ މިއަދުގެ ޖަލްސާ ބޭއްވުނުކަމީ، ދިވެހި ސަރުކާރާއި، ރައްޔިތުންގެ މަޖިލީހުގެ ޤާބިލުކަން ދުނިޔެއަށް ފެނިގެންދިޔަ ކަމެއް ކަމުގައި އިދިކޮޅު ޕީއެންސީގެ ޕީޖީ ލީޑަރު މަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވެއްޖެއެވެ.

ކުރީގެ ޑިފެންސް މިނިސްޓަރ މިހެން ވިދާޅުވެފައި ވަނީ މިއަދު އޮންލައިންކޮށް ބޭއްވި ރައްޔިތުންގެ މަޖިލީހުގެ ޖަލްސާގައި ވާހަކަފުޅު ދައްކަވަމުންނެވެ. އާދަމް ޝަރީފް ވިދާޅުވީ ކޯވިޑް-19 އާ ގުޅިގެން ރާއްޖޭގައި ވަރަށް ޒިންމާދާރު، ޤާބިލް ބޭފުޅުންކޮޅެއް މަސައްކަތް ކުރައްވަމުން ގެންދަވާ ކަމަށާއި، މަޖިލީހުންވެސް މިއަދު ޢަމަލުކުރަމުން މިދަނީ އެބޭފުޅުން ދެއްވަމުން ގެންދަވާ އިރުޝާދުތަކުގެ މަތިން ކަމަށެވެ.

ރާއްޖޭގެ އިޤްތިޞާދީ ހާލަތު ދަށްވެ ރައްޔިތުންނަށް ލިބޭ ޢާމްދަނީ ދަށްވަމުންދާކަން ފާހަގަ ކުރައްވަމުން މެމްބަރު އާދަމް ޝަރީފް ވިދާޅުވީ ކުރިއަށް އޮތީ ރަމަޟާން މަސް ކަމަށާއި، ތަކެތީގެ އަގު ކޮންޓްރޯލް ކުރުމަށް ސަރުކާރުން މަސައްކަތް ކުރި ނަމަވެސް އެކި ދުވަސްވަރު އެކިގޮތަށް އެ އަގުތައް ބަދަލުވަމުން ދާނެކަމަށެވެ. އަދި މަސްވެރިކަމާއި، ދަނޑުވެރިކަން އިތުރަށް ފުޅާކުރުމަށް މަސައްކަތް ކުރަން ޖެހޭކަންވެސް އޭނާ ފާހަގަކުރެއްވިއެވެ.

މިފަދަ ހައްސާސް ވަގުތެއްގައި އެންމެންވެސް މަސައްކަތް ކުރަމުންދާންވާނީ ސަރުކާރާއި އެކުގައިކަމަށްވެސް އާދަމް ޝަރީފު ވިދާޅުވިއެވެ.