ރިސޯޓްތަކުން މުވައްޒަފުން ފޭބުމާއި ރަށްރަށަށް ދަތުރު ކުރުމުގެ ހުއްދަ ދިނުމުގައި ލުއިތަކެއް ލިބޭ ގޮތަށް، ކުރީގެ އެންގުމަށް ބަދަލު ގެނެސްފިއެވެ.

ޑިރެކްޓަރ ޖެނެރަލް އޮފް ޕަބްލިކް ހެލްތު ރޭ ނެރުއްވި އެންގެވުމުގައިވާ ގޮތުން ޓޫރިސްޓުން ރިސޯޓުގައި ތިއްބަސް، ރިސޯޓުން ކަނޑައަޅާ ތަނެއްގައި 14 ދުވަސް ވަންދެން ކަރަންޓީންގައި ހޭދަކުރުމަށް ފަހު މުވައްޒަފުންނަށް އެހެން ރަށަކަށް ދެވިދާނެއެވެ. އެކަމަކު އެ ހާލަތުގައި ވެސް ރިސޯޓުން ފޭބުމުގެ ހުއްދަ ދެވޭނީ ކޯވިޑް-19 އަށް ޓެސްޓް ކުރުމަށް ފަހު ނަތީޖާ ލިބުމުން ކަމަށް އެ އެންގުމުގައިވެއެވެ.

މީގެ އިތުރުން އެންމެ ފަހު ޓޫރިސްޓު މީހާ ރިސޯޓުން ދިޔަތާ 14 ދުވަސް ހަމަވުމަށް ފަހު އެ މުއްދަތުގައި އެ ބައްޔަށް ޕޮޒިޓިވްވި މީހެއް ނުވަތަ ޝައްކު ކުރެވޭ މީހަކު ރިސޯޓުގައި ނެތް ނަމަ، މުވައްޒަފުންނަށް އެހެން ރަށްރަށަށް ދަތުރު ކުރެވިދާނެ ކަމަށް އެ އެންގުމުގައިވެއެވެ. އަދި ކުރިން ވެސް އޮތް ގޮތަށް، ފަހު ޓޫރިސްޓް މީހާ ރިސޯޓުން ފޭބިތާ 14 ދުވަސް ހަމަވުމުން ވެސް އެހެން ތަންތަނަށް ދަތުރު ކުރުމުގެ ހުއްދަ މުވައްޒަފުންނަށް އޮންނާނެ ކަމަށް އެ އެންގުމުގައިވެއެވެ.

އެހެންނަމަވެސް މިއިން ކޮންމެ ޙާލަތެއްގައިވެސް މުވައްޒަފުންނަށް ރިސޯޓުން ފޭބުމުގެ ހުއްދަ ދެވޭނީ އެޗްޕީއޭ އަށް އެކަން ހުށަހަޅައި، ހުއްދަ ދިނުމުންނެވެ. ރިސޯޓްތަކުގެ މުވައްޒަފުން ރަށުން ފޭބުމުގައި ލުއިތަކެއް ދިންއިރު، އެއް ރިސޯޓުން އަނެއް ރިސޯޓަށް ޓޫރިސްޓުން ގެންދިއުމުގެ ހުއްދަ ވެސް ދާދިފަހުން އެޗްޕީއޭ އިން ވަނީ ޓޫރިޒަމް މިނިސްޓްރީއަށް ދީފައެވެ.