ހައުސިން ޑިވެލޮޕްމެންޓް ކޯޕަރޭޝަން، އެޗްޑީސީން އާންމުންނަށް ކުއްޔަށް ދީފައި ހުރި ފްލެޓްތަކުގެ ކުރިއަށް އޮތް ދެ މަހުގެ ކުލިން 30 ޕަސެންޓް ފަސްކޮށްދީފިއެވެ.

އެޗްޑީސީން ބުނެފައިވަނީ އެ ކުންފުނިން ދޫކޮށްފައިވާ ފްލެޓްތަކުގެ އިތުރުން ގޯއްޗާއި ކުއްޔަށް ދޫކޮށްފައިވާ ކޮމާޝަލް ޔުނިޓްތަކާއި ސިނާއީ ބިންތަކަށް ދައްކާ ފައިސާ ނުވަތަ ކުލީގެ 30 ޕަސެންޓް ފައިސާ ކުރިއަށް އޮތް ދެ މަހު ދައްކާކަށް ނުޖެހޭނެއެވެ.

އެކަމަކު މިގޮތަށް ހަމަޖައްސައިދޭނީ މީގެ ކުރިން ގަވައިދާ އެއްގޮތަށް ކުލި ދައްކާފައިވާ ފަރާތްތަކަށް އެކަންޏެވެ. އެޗްޑީސީން ބުނީ މި ލުއި ހޯދުމަށް ފޯމު ހުށަހަޅާ މީހުންގެ ތެރެއިން ބޭންކް އޮފް މޯލްޑިވްސް (ބީއެމްއެލް) ގެ ޑައިރެކްޓް ޑެބިޓް މެދުވެރިކޮށް އޭޕްރީލް މަހާއި މެއި މަހުގެ ކުލި އެއްކޮށް ދައްކާފައިވާ ނަމަ އެ ޖަމާކުރި ފައިސާގެ 30 ޕަސެންޓް އެޗްޑީސީން އަނބުރާ ވެރިފަރާތަށް ދޭނެ ކަމަށެވެ.

ފަސް ކޮށްދޭ 30 ޕަސެންޓް ފައިސާ ދެއްކުމަށް އެއް އަހަރަށް ވުރެ ކުރު ނޫން މުއްދަތެއް ދިނުމަށް ވެސް އެޗްޑީސީން ވަނީ ނިންމައިފައެވެ. އެޗްޑީސީން ބުނީ، މި މުއްދަތުގައި ގަވައިދާ އެއްގޮތަށް ފައިސާ ދައްކަން އުނދަގޫވާ ނަމަ އެކަންކަން ހާމަކޮށް ހުށަހެޅުމުން، އެ ކޯޕަރޭޝަނުން އަމަލުކުރާ ޑެޓް ކަލެކްޝަން ޕޮލިސީއާ އެއްގޮތްވާ ގޮތުގެ މަތިން ފައިސާ ދެއްކުމަށް ފުރުސަތު ދޭނެކަމަށެވެ.

މީގެ އިތުރުން އެޗްޑީސީން ދޫކޮށްފައިވާ ކޮންވެންޝަނަލް ލޯނުތައް އިސްލާމިކް ލޯނު އުސޫލަށް ބަދަލު ކުރުމުގެ ފުރުސަތު ވެސް މިހަރު ހުޅުވާލެވިފައި ވާކަމަށް އެކޯޕަރޭޝަނުން ވަނީ ބުނެފައެވެ. މި ބަދަލު ގެނައުމުން ލޯނަށް ކޮމްޕައުންޑް އިންޓްރެސްޓް ނާރާނެ ކަމުގައި ވެސް އެކުންފުނިން ބުނެފައި ވެއެވެ.