‎ނިމިދިޔަ މާރޗް މަހުގެ 14 ގެ ފަހުން އިނގިރޭސި ވިލާތުން ރާއްޖެއައި ހުރިހާ އެންމެން ކޯވިޑް-19 އަށް ޓެސްޓްކުރާނެކަމަށް އެޗް.ޕީ.އޭ އިން ބުނެފިއެވެ.

‎ކޯވިޑް-19 އާ ގުޅޭގޮތުން މަޢުލޫމާތު ދިނުމަށް ދަރުބާރުގޭގައި މިރޭ ބޭއްވި ޕްރެސް ކޮންފަރެންސްގައި ސަރުކާރުގެ ތަރުޖަމާނު މުޙައްމަދު މަބްރޫކް އަޒީޒު ވިދާޅުވީ، މާރޗް 14 އިން 19 އާ ދެމެދު އިނގިރޭސި ވިލާތުން އައި ހުރިހާ އެންމެން އަދި އެމީހުންނާ ކޮންޓެކްޓްވި އެންމެން ޓެސްޓްކުރާނެކަމަށެވެ.

‎އިތުރަށް މަބްރޫކް ވިދާޅުވީ، މިގޮތަށް ޓެސްޓްކުރަން ނިންމާފައިވަނީ، އިނގިރޭސިވިލާތުން ރާއްޖެއައި 3 ދިވެހީން ކޯވިޑް-19 އަށް ފައްސިވެފައި ވާތީއެވެ. އަދި މިކަން ކުރަނީ އިނގިރޭސިވިލާތުން ރާއްޖެއައި މީހުން އަދި އެމީހުންނާ ކޮންޓެކްޓްވި މީހުންގެ ހަށިގަނޑުގައި ވައިރަސް ނެތްކަން ޔަޤީންކުރުމަށް ކަމަށް މަބްރޫކް ވިދާޅުވިއެވެ.

މިހާތަނަށް ކޯވިޑް-19 އަށް ޕޮޒިޓިވް ތިން ދިވެހިންނަކީވެސް އިނގިރޭސި ވިލާތުން އެނބުރި އައިސް ރާއްޖޭގައި ކަރަންޓީނުގައި ތިބި މީހުންނެވެ. އެންމެ ފަހުން ބަލި ޖެހިގެން ޕޮޒިޓްވީ ކުރިން ޕޮޒިޓިވް ވި މީހާއާއި އެއްކޮޓަރިއެއްގައި ހުރި މީހެކެވެ.