‎ކޯވިޑް-19 އަށް ޕޮޒިޓިވް ވެފައިވާ މީހުންނަށް ފަރުވާ ދިނުމުގައި ޙަރަކާތްތެރިވި ޑޮކްޓަރަކު ކަރަންޓީނު ކޮށްފިއެވެ.

‎ކޯވިޑް-19 އާ ގުޅޭގޮތުން މަޢުލޫމާތު ދިނުމަށް ރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި، ސަރުކާރުގެ ތަރުޖަމާނު މަބްރޫކް ވިދާޅުވީ، ޑޮކްޓަރު ކަރަންޓީނު ކުރެވިފައިވަނީ، ޑޮކްޓަރުގެ ފަރާތުން ބައްޔަށް ޝައްކުކުރެވޭ އަލާމާތްތަކެއް ފެނިގެން ކަމަށެވެ. ބަލީގެ އަލާމާތްތައް ފެނިގެން ކަރަންޓިން ކޮށްފައިވަނީ ބިދޭސީ ޑޮކްޓަރެކެވެ.

‎މީގެއިތުރުން، ދަރުމަވަންތަ ހޮސްޕިޓަލުގައި ޙަރަކާތްތެރިވި 6 ސިއްހީ އޮފިޝަލުންގެ ފަރާތުން ޝައްކުކުރެވޭ އަލާމާތްތަކެއް ފެނިގެން، އެ މީހުން އައިސޮލޭޓްކުރި ކަމަށާއި، ނަމަވެސް ޓެސްޓްތަކުގެ ނަތީޖާ ނެގެޓިވް ވެފައިވާ ކަމަށްވެސް އޭނާ ވިދާޅުވިއެވެ.