ޤައުމީ ޔުނިވަރސިޓީގެ މާލެ އާއި އަތޮޅުތަކުގެ ދަނާލުތަކުގައި ތިބި ދަރިވަރުންގެ މާރޗް މަހާއި އޭޕްރިލް މަހުގެ ދަނާލު ފީ މަޢާފުކުރުމަށް ޤައުމީ ޔުނިވަރސިޓީން ނިންމައިފިއެވެ.

މި ފިޔަވަޅު އެޅުމަށް އެ ޔުނިވަރސިޓީން ނިންމީ ކޯވިޑް-19 އާ ގުޅިގެން ޔުނިވަރސިޓީގެ ކިޔެވުން ކުރިއަށް ނުގެންދެވޭތީ އާއި އަދި ޤައުމުގެ އިޤްތިޞާދީ ގިނަ ޙަރަކާތްތަކެއް ހުއްޓުމަކަށް އައިސްފައިވާތީއެވެ.

ކޯވިޑް-19 އާ ގުޅިގެން ކޮލެޖްތަކާއި ޔުނިވާސިޓީތައް ބަންދު ކުރަން ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އެންގީ މާރޗް 14 ވަނަ ދުވަހުއެވެ.

ރާއްޖެއިން މިހާތަނަށް ކޯވިޑް-19 އަށް ފައްސި (ޕޮޒިޓިވް) ވެފައި ވަނީ 18 މީހެކެވެ. އޭގެ ތެރެެއިން 13 މީހަކު ވަނީ ރަނގަޅުވެފައެވެ. މިހާރު ރާއްޖޭގައި ފަރުވާދެމުން ދަނީ ތިން ދިވެއްސަކަށެވެ. އަނެއް ދެމީހުން ނަކީ ރާއްޖެއިން ފުރިފަހުން ބައްޔަށް ޕޮޒިޓިވްވިކަން އެނގުނު ދެމީހުންނެވެ.