ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ކޯވިޑް-19 އަށް ޓެސްޓު ކުރައްވައިފިއެވެ.

ރައްޔިތުންގެ މަޖިލީހުގެ އިދާރާއިން މިއަދު ވަނީ، އެމަނިކުފާން ކޯވިޑް-19 އަށް ޓެސްޓް ކުރެއްވި މަންޒަރު ދައްކުވައިދޭ ވީޑިއޯއެއް އެ އިދާރާގެ ރަސްމީ ޓްވިޓަރ އެކައުންޓުން ޙިއްސާކޮށްފައެވެ.

އެމަނިކުފާން ކޯވިޑް-19 އަށް ޓެސްޓު ކުރައްވަން ޖެހިވަޑައިގަތީ، މާރޗް މަހުގެ 14 އިން 19 ވަނަ ދުވަހާ ދެމެދު އިނގިރޭސިވިލާތުން ރާއްޖެ އައި އެންމެން އަދި އެމީހުންނާއި ކޮންޓެކްޓްވީ މީހުން ކޯވިޑް-19 އަށް ޓެސްޓުކުރަން އެޗްޕީއޭ އިން ނިންމުމާއި ގުޅިގެންނެވެ.

ރާއްޖޭގައި މިހާތަނަށް ކޯވިޑް-19 އަށް ޕޮޒިޓިވް ވި ހަތަރު ދިވެހީންނަކީވެސް އިނގިރޭސި ވިލާތުން ރާއްޖެއައިސް ކަރަންޓީނުގައި ތިބި މީހުންނެވެ.

ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު #ކޮވިޑް19 އަށް ޓެސްޓު ކުރައްވައިފި pic.twitter.com/JOAX8I9sLZ

— People's Majlis (@mvpeoplesmajlis) April 1, 2020

‌‎ރައީސް ނަޝީދު ހުސްވި މާރޗް މަހުގެ 11 އިން 14 އަށް އިނގިރޭސިވިލާތަށް ދަތުރުފުޅެއް ކުރެއްވިއެވެ. ރައީސް ނަޝީދު އެދަތުރުފުޅު ކުރެއްވި ދުވަސްވަރު އިނގިރޭސިވިލާތުން ރާއްޖެ އަންނަ އެންމެން ކޯވިޑް-19 އަށް ޓެސްޓެއް ނުކުރެއެވެ.

ރައީސް ނަޝީދު ވިދާޅުވެފައިވަނީ އެމަނިކުފާނުގެ ހަށިކޮޅުން ކޯވިޑް-19 ގެ އެއްވެސް އަލާމާތެއް އަދި ފެނިވަޑައި ނުގަންނަވާ ކަމަށެވެ. މީގެއިތުރުން އެމަނިކުފާން މިއަދު ކޯވިޑް-19 އަށް ޓެސްޓް ކުރައްވާފައިވާއިރު އެމަނިކުފާނުވަނީ އެފަދަ މީހަކާއި ގުޅުމެއް ހުރި ކޮންމެ ބޭފުޅަކުވެސް އަމިއްލަފުޅަށް ޓެސްޓް ކުރެއްވުމަކީ އެންމެ ރަނގަޅު އަދި އެންމެ ރައްކާތެރި ގޮތް ކަމުގައި ވިދާޅުވެ އެކަމަށް ނަސޭހަތްތެރިވެ ވަޑައިގެންފައެވެ.