ލޮކާނޯ ފިލްމު ފެސްޓިވަލްގައި ބައިވެރިވުމަށް ބޮލީވުޑުގެ އެތައް ބައެއްގެ ލޯބި ލިބިފައިވާ މަޝްހޫރު ބަތަލެއް ކަމަށްވާ ޝާހްރުކް ޚާން ސުވިޒަލޭންޑަށް ގޮއްސި ކަމަށް މީޑިއާތަކުން ރިޕޯޓު ކޮށްފިއެވެ.

ހިންދުސްތާނީ ޓައިމްސްގައިވާ ރިޕޯޓެއްގައި ބުނެފައިވަނީ ޝާހުރުކް ޚާން ލޮކާނޯ ފިލްމު ފެސްޓިވަލްގައި ބައިވެރިވުމަށް ސުވިޒަލޭންޑަށް ގޮސްފައިވާ ކަމަށާއި، މި ފެސްޓިވަލް ގައި އޭނާއަށް ކެރިއަރު އެޗީވްމެންޓު އެވޯޑު ލިބޭނެ ކަމަށެވެ. އެގޮތުން މި އެވޯޑަކީ ސިނަމާއަށް ޝާހުރުކް ކޮށްދެއްވި ހިދުމަތްތަކާއި، ދުނިޔޭގެ އެކި ކަންކޮޅުގެ ބެލުންތެރިންނަށް "ބޮލީވުޑު" ގެންދިއުމުގައި އޭނާ އަދާ ކުރި ދައުރުގެ އަގު ވަޒަން ކުރުމުގެ ގޮތުން ދޭ އެވޯޑެއް ކަމަށްވެސް މި ރިޕޯޓުގައި ވެއެވެ. މި ފެސްޓިވަލް ބޭއްވުމަށް ހަމަޖެހިފައިވަނީ މިއަދުގެ ވަގުތެއްގައެވެ.

މީގެ އިތުރުން އޮގަސްޓު 11ގައި ސިނެމާ ގްރޭންރެކްސްގައި ބާއްވާ ހަފްލާއެއްގައި އޭނާ ވާހަކަ ދައްކާނެ ކަމަށްވެސް މި ރިޕޯޓުގައި ވެއެވެ. އަދި ދުނިޔޭގެ އެކި ކަންކޮޅުތަކުގައި ތިބި ސަޕޯޓަރުންނަށް އޭނާގެ ވާހަކަ އަޑުއަހާލުމުގެ ފުރުސަތު ދިނުމުގެ މަގުސަދުގައި މި ހަފްލާ ލައިވް ސްޓްރީމް ކުރާނެ ކަމަށްވެސް ރިޕޯޓުގައި ބުނެފައިވެއެވެ.

ޝާހުރުކް އަކީ 30 އަހަރަށްވުރެ ގިނަ ދުވަހު ފިލްމީ ދާއިރާގައި މަސައްކަތް ކޮށްފައިވާ ގްލޯބަލް އައިކޮން އަކަށް ވީއިރު، އޭނާއަށް ވަނީ އެތަށް ބައެއްގެ ލޯބި ލިބިފައެވެ. އޭނާގެ ފިލްމީ ކެރިއަރުގައި އޭނާ ވަނީ 100 އަށް ވުރެ ގިނަ ފިލްމު ކުޅެފައެވެ. އެގޮތުން އޭނާ ކުޅެފައިވާ ބައެއް ބްލޮކްބަސްޓަރު ފިލްމުތަކުގެ ތެރޭގައި ޑަންކީ އާއި، ރައީސް އާއި، ޖަވާން އާއި، އަދި ޕަތާން ފަދަ ފިލްމުތައް ހިމެނެއެވެ.