ދަރިފުޅު އާރިޔަން ޚާން އުފަންވީއިރު ދުނިޔޭގެ ނަން މަޝްހޫރު ހޮލީވުޑްގެ ތަރި ޖެކީ ޗޭން އާއި ވައްތަރު ގޮތެއް ހުރުމުން، އޭނާ ދެވަނަ ޖެކީޗަން އަށްވާނެ ކަމަށް އުއްމީދު ކުރި ކަމަށް ބޮލީވުޑުގެ މަޝްހޫރު ތަރި ޝާހުރުކް ޚާން ބުނެފިއެވެ.

ޕިންކް ވިލާގައިވާ ރިޕޯޓްކޮށްފައިވާގޮތުގައި ޝާހުރުކް މިހެން ބުނެފައިވަނީ ލޯކާނޯ ފިލްމު ފެސްޓިވަލްގައި ވާހަކަ ދައްކަމުންނެވެ. އެގޮތުން މި ފިލްމު ފެސްޓިވަލް ގައި އޭނާ އެންމެ ގަޔާވާ އެކްޓަރާ ބެހޭ ގޮތުން ވާހަަކަ ދައްކަމުން އޭނާއަށް އެންމެ ކަމުދާ އެކްޓަރަކީ ހޮލީވުޑުގެ މަޝްހޫރު ތަރި ޖެކީ ޗޭން ކަމަށް އޭނާ ބުނެއެވެ. އަދި އޭނާގެ ދަރިފުޅު އާރިޔަން ޚާން އުފަންވީއިރު ޖެކީ ޗޭން އާއި ވައްތަރު ގޮތެއް ހުރި ކަމަށްވެސް ޝާހުރުކް ބުނިކަމަށް އެ ރިޕޯޓުގައި ވަނީ ފާހަގަކޮށްފައެވެ.

ޝާހުރުކް އިތުރަށް ބުނެފައިވާ ގޮތުގައި އާރިޔަން ޖެކީ އާއި ވައްތަރު ގޮތެއް ހުރުމުން އާރިޔަން އަށް "ޓައެކްވޮންޑޯ" ކްލާސްތަކެއް ނަގައިދީ ތަޅަން ދަސްކޮށްދީފައެވެ. މި ރިޕޯޓުގައި ވެއެވެ. އަދި އާރިޔަން ބޮޑުވެގެން ޖެކީ ޗޭން ކަހަލަ މީހަކަށް ނުވަތަ ދެވަނަ ޖެކީ ޗޭން އަށް ވާނެ ކަމަށް އުންމީދު ކުރި ކަމަށް އޭނާ ބުނެފައިވާ ކަމަށްވެސް ޕިންކްވިލާގެ ރިޕޯޓުގައި ވެއެވެ.

ދާދި ފަހުން ސުވިޒަލޭންޑުގައި ބޭއްވި 77 ވަނަ ލޮކާނޯ ފިލްމު ފެސްޓިވަލްގައި ޝާހުރުކް ޚާން އަށް ވަނީ ލައިފްޓައިމް އެޗީވްމެންޓު އެވޯޑެއް ކަމަށްވާ "ޕާޑޯ އަލާ ކެރިއެރާ" ނުވަތަ "ކެރިއާރ ލެޕާޑު" ލިބިފައެވެ. އޭނާ ދެން އެންމެ އަވަހަށް ފެނިގެންދާނީ ސުޖޯއި ގޯޝްގެ ފިލްމެއް ކަމަށްވާ "ކިންގު" އިންނެވެ. މި ފިލްމުގައި އޭނާއާއެކު މުހިންމު ރޯލަކުން އޭނާގެ ދަރިފުޅު ސުހާނާ ޚާން ފެނިގެންދާނެއެވެ.