ފިލްމު ޕްރޮޑިއުސަރަކަށް ވީ އެކްޓަރެއްގެ ގޮތުގައި އޭނާއަށް ކުރެވުނު މަސައްކަތްތަކާމެދު ހިތްހަމަ ނުޖެހިގެން ކަމަށް ބޮލީވުޑުގެ މަޝްހޫރު އެކްޓަރު އަދި ޕްރޮޑިއުސަރު ޖޯން އަބްރަހަމް ބުނެފިއެވެ.

އޭނާ މިހެން ބުނެފައިވަނީ ރަންވީރު އައްލާބާޑިއާއާއެކު ކުރިއަށް ދިޔަ އިންޓަވިއުއެއްގައި، އޭނާގެ ކެރިއަރު ބަދަލު ކުރި ސަބަބާ މެދު ވާހަކަ ދައްކަމުން ކަމަށް ޕިންކް ވިލާގެ ރިޕޯޓެއްގައި ވަނީ ބުނެފައެވެ.

ޖޯން ބުނެފައިވަނީ އެކްޓަރެއްގެ ގޮތުގައި ހުރެފައި އޭނާ ޕްރޮޑިއުސަރަކަށް ބަދަލުވީ، އެކްޓަރެއްގެ ހައިސިއްޔަތުން އޭނާ ކުރަމުންދިޔަ މަސައްކަތާމެދު އޭނާ އެހާބޮޑަށް ހިތްހަމަ ނުޖެހޭތީ ކަމަށެވެ. އަދި އޭގެ ސަބަބުން މަސައްކަތް ބަދަލު ކުރަން ބޭނުން ވީ ކަމަށްވެސް އޭނާ ވަނީ މި އިންޓަވިއުގައި ބުނެފައެވެ.

އޭނާ އިތުރަށް ބުނެފައިވަނީ ޕްރޮޑިއުސަރަކަށް ވުމަށްފަހު އިންޑަސްޓްރީގެ މީހުން އޭނާއާމެދު ދެކެމުން އައި ގޮތް ބަދަލު ވެފައިވާ ކަމަށާއި، އޭނާއަކީ ހަމައެކަނި ރީތިކަމާއި ހަށިގަނޑެއް ލިބިފައިވާ އެކްޓަރެއް ނޫންކަން ގަބޫލުކޮށް، ވިސްނުންވެސް ތޫނު، ގާބިލު މީހެއް ކަމަށް ގަބޫލު ކުރަން ފަށާފައިވާ ކަމަށެވެ.

ގިނަ ބައެއްގެ ތަރުހީބު ލިބެމުން އަންނަ ޖޯން އަބްރަހަމް ޑައިރްކެޓު ކޮށްފައިވާ ބައެއްް ފިލްމު ތަކުގެ ތެރޭގައި، ވިކީ ޑޯނާ އާއި، ޕަރްމާނޫ އާއި، ބަޓްލާ ހައުސް ފަދަ ފިލްމުތައް ހިމެނެއެެވެ. އޭނާ މިހާރު އަންނަނީ އޭނާގެ ފިލްމު "ވޭދާ" ނެރުމަށް ތައްޔާރުވަމުންނެވެ. ނިކިލް އަދްވާނީ ޑައިރެކްޓުކޮށްފައިވާ މި ފިލްމުގައި އޭނާއާއެކު ލީޑުން ފެނިގެންދާނީ ޝަރްވަރީ އެވެ. ގިނަ ބަޔަކު އިންތިޒާރު ކުރަމުން އަންނަ މި ފިލްމު މިއަދު ސިނަމާތަކަށް ނެރޭނެއެވެ.