ބޮލީވުޑުގެ އެންމެ މަގުބޫލު ތިން ޚާނުން ކަމަށްވާ ސަލްމާން ޚާން އާއި، ޝާހުރުކް ޚާން އަދި އާމިރު ޚާން އެކުގައި ފެނިގެންދާ ފިލްމެއް އުފައްދަން ބޭނުންވާ ކަމަށް ބޮލީވުޑުގެ ބަތަލާ އަދި ޑައިރެކްޓަރު ކަންގަނާ ރަނައުތު ބުނެފިއެވެ.

ކަންގަނާ މިހެން ބުނެފައިވަނީ އޭނާގެ ކުރިއަށް އޮތް ފިލްމު "އިމަޖެންސީ" ގެ ޓްރެއިލާ ނެރުމަށް ބޭއްވި ހަފްލާގައި ވާހަކަ ދައްކަމުންނެވެ. ނިއުސް 18 ގައި ބުނެފައިވަނީ ބޮލީވުޑުގެ އެންމެ ނަންވިދާ ތިން ޚާނުން، ސަލްމާން އާއި، ޝާހުރުކް އަދި އާމިރު އެކުގައި ފެނިގެންދާނެ ފިލްމެއް އުފައްދަން ނުވަތަ ޑައިރެކްޓު ކުރަން ބޭނުން ވާކަމަށް ކަންގަނާ ބުނެފައިވާ ކަމަށެވެ. އަދި އެ ތިން ތަރިންގެ ހުނަރު އެންމެ ފުރިހަމަ އަށް ފެންނަ ފަދަ، މުޖުތަމައަށް ފައިދާހުރި ފިލްމެއް އުފައްދަން ބޭނުން ވާކަމަށާއި، މި ތިން ތަރިންގެ ހުނަރުތައް އަދި އެންމެ ފުރިހަމައަށް ބެލުންތެރިންނާ ހަމައަށް ގެނެސްދެވިފައި ނުވާކަމަށްވެސް އޭނާ ވަނީ ބުނެފައެވެ.

މީގެ އިތުރުން ކަންގަނާ ވަނީ މި ތިން ތަރިންގެ މަސައްކަތަށް ތައުރީފުކޮށްފައެވެ. އެގޮތުން އޭނާ ބުނެފައިވަނީ މުޅި ދުނިޔެއަށް ބޮލީވުޑު ތައާރަފު ކުރުމުގައި މި ތިން ތަރިންގެ ރޯލު ވަރަށް ބޮޑު ކަމަށާއި، މި ތިން ތަރިންގެ މަސައްކަތަށް މުޅި ފިލްމު އިންޑަސްޓްރީއިންވެސް ފަހުރުވެރި ވާކަމަށެވެ. އަދި ހަމަ އެހެންމެ މި ތިން ތަރިން ބޮލީވުޑުގެ ފިލްމީ ދާއިރާއަށް ކޮށްދީފައިވާ ހިދުމަތްތަކުގެ އަގު ވަޒަންކޮށް ޝުކުރުވެރިވާން ޖެހޭ ކަމަށްވެސް ކަންގަނާ ވަނީ ބުނެފައެވެ.

ބޮލީވުޑުގެ ނަން މަޝްހޫރު ބަތަލާ ކަންގަނާ މިހާރު ދަނީ އޭނާގެ ކުރިއަށް އޮތް ފިލްމު "އިމަޖެންސީ" ނެރުމަށް ތައްޔާރުވަމުންނެވެ. މި ފިލްމަކީ ސިޔާސީ ފިލްމަކަށް ވާއިރު މި ފިލްމު ޑައިރެކްޓު ކުރުމުގެ އިތުރުން ފިލްމުގެ ލީޑު ރޯލުން ފެނިގެންދާނީވެސް ކަންގަނާ އެވެ. އެތަށް ފަހަރަކު ސިނަމާތަކަށް ނެރުން ލަސްކޮށްފައިވާ މި ފިލްމު، މިހާރު ނިކުތުމަށް ހަމަޖެހިފައިވަނީ އަންނަ ސެޕްޓެމްބަރު މަހުގެ 06 ވަނަ ދުވަހުގައެެވެ.