ބޮލީވުޑުގެ ނަން މަޝްހޫރު ޚާނުންކަމަށްވާ، ސަލްމާން ޚާން، ޝާހުރުކު ޚާން، އަދި އާމިރު ޚާން އާއިއެކު މަސައްކަތް ކޮށްފައިނުވާ ސަބަބު ބޮލީވުޑުގެ ނަންވިދާ ތަރި ޝްރައްދާ ކަޕޫރު ހާމަ ކޮށްފިއެވެ.

އެގޮތުން ޝުބަންކަރު މިޝްރާއާއެކު ކުރިއަށްދިޔަ ޕޮޑްކާސްޓަކަށް ދިން އިންޓަވިއުއެއްގައި ޝްރައްދާ ބުނެފައިވަނީ ބޮލީވުޑުގެ ނަން މަޝްހޫރު ތިން ޚާނުންނާއެކު މަސައްކަތް ކުރަން ފުރުސަތު ލިބުނުނަމަވެސް، އެ ރޯލު ތަކަކީ އޭނާ އެހާ ގަޔާވާ ރޯލުތަކަކަށް ނުވުމުން، ނުވަތަ އޭނާއާ އެހާ ގުޅޭ ރޯލުތަކަށް ނުވާތީ އެރޯލުތައް ނުކުޅުނީ ކަމަށެވެ.

ޝްރައްދާ ބުނީ އޭނާ ބޭނުންވަނީ ބެލުންތެރިންނާ ގުޅޭ ފަދަ، މާނަފުން ވާހަކަތަކަށް ބިނާކޮށް ހަދާ ކޮލިޓީ ފިލްމު ތަކުގައި މަސައްކަތް ކުރަން ކަމަށެވެ. އަދި އެފަދަ ފިލްމެއްގައި މި ތިން ޚާނުންގެ ތެރެއިން ތަރިއަކާއެކު މަސައްކަތް ކުރުމުގެ ފުރުސަތު ލިބިއްޖެނަމަ އޭނާ އެ ރޯލެއް ކުޅޭނެ ކަމަށެވެ.

ބޮލީވުޑުގެ އެތައް ބައެއްގެ ލޯބި ލިބެމުން އަންނަ ތަރި ޝްރައްދާ އެންމެ ފަހުން ފެނިފައިވަނީ ހިންދީ ފިލްމު "ސްޓްރީ 2" އިންނެވެ. މި ފިލްމަށް އާންމުންގެ ބޮޑު ތަރުހީބެއް ލިބިފައިވާއިރު، މި ފިލްމަށް ބޮކްސް އޮފީހުގައިވެސް ބޮޑު އާމްދަނީ އެއް ދަނީ ލިބެމުންނެވެ.

މިމަހުގެ 15 ގައި ރިލީޒް ކުރި ސްޓްރީ 2 ފިލްމުގެ މުހިންމު ރޯލުތަކުން ޝްރައްދާގެ އިތުރުން ރާޖުކުމާރު ރާއޯ އާއި ޕަންކަޖު ތުރިޕާތީ އާއި، އަޕްރްޝަކްތީ ކުރާނާ އަދި އަބިޝޭކު ބަންޖަރީ ފެނިގެންދެއެެވެ. އަދި މި ފިލްމުގެ ހާއްސަ ފެނިލުމަކުން އަކްޝޭ ކުމާރު އާއި ވަރުން ދަވަންވެސް ވަނީ ފެނިގެންދެއެވެ.