ފިރިހެން ކުދިން ބޮޑުކުރާއިރު އެކުދިންނަަށް ރަނގަޅު ތަރުބިއްޔަތެއް ދޭން ޖެހޭ ކަމަށް ބޮލީވުޑުގެ މަޝްހޫރު ތަރި ޖޯން އަބްރަހަމް ބުނެފިއެވެ.

އޭނާ މިހެން ބުނެފައިވަނީ އިންޑިއާގެ ކޮލްކަޓާގައި ދާދި ފަހުން ރޭޕްކޮށް އަންހެން ޑޮކްޓަރަކު މަރާލި ހާދިސާ އާއި ގުޅިގެން ވާހަކަަ ދައްކަމުންނެވެ. އެގޮތުން ރޭޑިއޯ ނަޝާއަށް ދިން އިންޓަވިއުއެއްގައި އޭނާ ބުނެފައިވަނީ މިފަދަ ކަންތައްތަކުން މުޖުތަމައު ރައްކާތެރި ކުރަން ބޭނުންވާނަމަ ފިރިހެން ކުދިން ބޮޑު ކުރާއިރު އެކުދިންނަށް ރަނގަޅު ތަރުބިއްޔަތެއް ދޭން ޖެހޭކަމަށެވެ.

މީގެ އިތުރުން ތަންކޮޅެއް ކުރިން އައްލާބާޑިއާއާއެކު ކުރިއަށް ދިޔަ ޕޮޑްކާސްޓެއްގައިވެސް ޖޯން ވަނީ އިންޑިއާގައި އަންހެން ކުދިން ރައްކާތެރިކަމެއް ނެތްކަމަށް ބުނެ ވާހަކަ ދައްކާފައެވެ. އެގޮތުން އޭނާ ބުނެފައިވަނީ އަންހެނުންނާއި ކުޑަކުދިންނަށް އިންޑިއާގައި އެއްވެސް ރައްކާތެރި ކަމެއް ނެއް ކަމަށާއި، އިންޑިއާގެ ފިރިހެންވެރިންނަށް އަންހެނުންނަށް ކަމޭހިތަން ދަސްކޮށްދޭން ޖެހޭ ކަމަށެވެ.

ޖޯން އަކީ ބޮލީވުޑުގައި އެތައް ފިލްމުތަކެއް ކުޅެފައިވާ، ބެލުންތެރިންގެ ލޯބި ވަރަށް ބޮޑަަށް ލިބެމުން އަންނަ ތަރިއެކެވެ. އޭނާގެ ބައެއް ފާހަގަ ކޮށްލެވޭ ފިލްމުތަކުގެ ތެރޭގައި ޖިސްމު، ދޫމް، ގަރަމް މަސާލާ ފަދަ ފިލްމުތައް ހިމެނެއެވެ. އޭނާ އެންމެ ފަހުން ފެނިފައިވަނީ ނިކިލް އަދްވާނީގެ ފިލްމު "ވެޑާ" އިންނެވެ. މި ފިލްމުގައި އޭނާއާއެކު މުހިންމު ރޯލުތަކުން ފެނިފައިވަނީ ޝަރުވަރީއާއި، އަބިޝޭކް ބަންޖަރީއެވެ.