ބޮލީވުޑުގެ މަޝްހޫރު ތަރި އަކްޝޭ ކުމާރުގެ ފިލްމު "ސްކައިފޯސް" 2025 ގެ ޖެނުއަރީގައި ނިކުންނާނެ ކަމަށް މީޑިއަަތަކުން ރިޕޯޓު ކޮށްފިއެވެ.

ގިނަ ބަޔަކު އިންތިޒާރު ކުރަމުން އަންނަ ފިލްމު "ސްކައިފޯސް" އަންނަ އަހަރުގެ ޖެނުއަރީ މަހުގައި ނިކުންނާނެ ކަމަށް ބޮލީވުޑު ހަންގާމާ އިން ވަނީ ރިޕޯޓު ކޮށްފައިވާއިރު، މި ފިލްމަކީ މީގެ ކުރިން މިއަހަރުގެ އޮކްޓޯބަރުގައި ނެރުމަށް ތާވަލް ކުރި ފިލްމެއް ނަމަވެސް މިމަހުގެ 15ގައި އަކްޝޭގެ ފިލްމު "ކޭލް ކޭލް މޭ" ނެރެފައިވާތީ ފިލްމުގެ ޕްރޮޑިއުސަރުންވަނީ މި ފިލްމު ނެރޭ ދުވަސް ފަސްކޮށްފައެވެ.

އަބިޝޭކް އަނިލް ކަޕޫރު އާއި ސަންދީޕު ކިއުލާނީ ގުޅިގެން ޑައިރެކްޓު ކުރާ މި ފިލްމަކީ ހަނގުރާމައިގައި ދިމާވާ އެކިއެކި ކަންތައްތައް ފެނިގެންދާ ފިލްމަކަށްވާއިރު، މި ފިލްމުގެ މުހިންމު ރޯލުތަކުން އަކްޝޭގެ އިތުރުން ސާރާ އަލީ ޚާން އާއި، ނިމްރަތު ކޯރު ފެނިގެންދާނެއެވެ. މި ފިލްމު ސިނަމާތަކަށް ނެރެވޭނެ ކަމަށް ބެލެވެނީ އިންޑިއާގެ 76 ވަނަ ޖުމުހުރީ ދުވަހުގައި ކަމަށް ބެލެވޭ ކަމަށް ރިޕޯޓުތަކުގައި ބުނެފައި ވެއެވެ.

އަކްޝޭ އަކީ ބޮލީވުޑުގައި ނަން ހިނގާ އަދި އެތައް ބައެއްގެ މެދުގައި މަގުބޫލުކަން ލިބިފައިވާ ވަރަށް ހުނަރުވެރި ތަރިއެކެވެ. އޭނާގެ ބައެއް މަޝްހޫރު ފިލްމުތަކުގެ ތެރޭގައި "ޕެޑް މޭން" އާއި، "ބްރަދާސް" އާއި "ރައުޑީ ރާތޯރު" ފަދަ ފިލްމުތައް ހިމެނެއެވެ. އޭނާ އެންމެ ފަހުން ފެނިފައިވަނީ މިމަހު 15 ގައި ނިކުތް ފިލްމު "ކޭލް ކޭލް މޭ" އިންނެވެ. މި ފިލްމުގައި އޭނާއައެކު ލީޑުން ތާޕްސީ ޕަންނޫ އާއި އަމީ ވާކު ފެނިފައިވާއިރު، މި ފިލްމަށް އާންމުންގެ ތަރުހީބުވެސް ދަނީ ލިބެމުންނެވެ.