ސިޔާސީ ކޯޅުންތަކާ ބެހޭ ފިލްމެއް ކަމަށްވާ ފިލްމު "އެމާޖެންސީ" ރިލީޒްކުރުމުގެ ހުއްދަ ނުލިބުއްޖެނަމަ ކޯޓަށްވެސް ދާން ތައްޔާރަށް ހުރިކަމަށް ބޮލީވުޑުގެ މަޝްހޫރު ތަރި ކަންގަނާ ރަނައުޓް ބުނެފިއެވެ.

އޭނާ މިހެން ބުނެފައިވަނީ އައިއޭއެންއެސް އަށް ދިން އިންޓަވިއުއެއްގައި ފިލްމު ނެރުމުގެ ހުއްދަ އަދި ނުލިބޭ ކަމާ ބެހޭ ގޮތުން ވާހަކަ ދައްކަމުންނެވެ. އެގޮތުން އޭނާ ބުނެފައިވަނީ އިންޑިއާގެ ސެންޓްރަލް ބޯޑު އޮފް ފިލްމު ސެޓިފިކޭޝަން (ސީބީއެފްސީ) އިން ފުރަތަމަ ފިލްމު ކްލިއާ ކުރިކަމުގައިވީނަމަވެސް ސްކްރީނިންގެ ފަހު މަރުހަލާތަކުގައި ފިލްމު ނެރުމުގެ ހުއްދަ ދިނުމަށް އިންކާރު ކޮށްފައިވާ ކަމަށެވެ.

މީގެ އިތުރުން ކަންގަނާ ބުނެފައިވަނީ ސީބީއެފްސީ އިން ފިލްމު ނެރުމުގެ ހުއްދަ ދީފައިނުވަނީ ބޭރުގެ ފަރާތްތަކުން ބާރުއަޅާތީ ކަމަށް ބެލެވޭ ކަމަށާއި، މި ފިލްމު ނެރުމުގެ ހުއްދަ ނުދީފިނަމަ އޭނާ ހުރީ ކޯޓަށް ދާންވެސް ތައްޔާރަށް ކަމަށެވެ. އޭނާ އިތުރަށް ބުނެފައިވަނީ އޭނާއަށްވެސް ހައްގުތަކެއް ލިބިފައިވާ ކަމަށާއި އެ ހައްގުތަށް ރައްކާތެރިކުރަން މަސައްކަތް ކުރާނެ ކަމަށެވެ.

ކަންގަނާއަކީ ބޮލީވުޑުގައި ގިނަ ބައެއްގެ ލޯބި ލިބިފައިވާ ކުޅަދާނަ ތަރިއެކެވެ. އޭނާގެ ބައެއް މަޝްހޫރު ފިލްމުތަކުގެ ތެރޭގައި "ރިވޮލްވާ ރާނީ" އާއި "ކުއީނު" ފަދަ ފިލްމު ހިމެނެއެވެ. ފިލްމު "އިމަޖެންސީ" އަކީ އޭނާ ޑައިރެކްޓު ކުރާ ފުރަތަމަ ފިލްމު ކަމަށްވީއިރު، މި ފިލްމުގެ ލީޑު ރޯލުންވެސް އޭނާ ފެންނާނެ ކަމަށް ރިޕޯޓުތަކުގައި ވެއެވެ.