ބޮލީވުޑުގެ މަޝްހޫރު ތަރި ސަލްމާނު ޚާންގެ މޭކަށްޓަށް ލިބިފައިވާ އަނިޔާ އެއްކޮށް ރަނގަޅު ނުވަނީސް އޭނާގެ ކުރިއަށް އޮތް ފިލްމު "ސިކަންދަރު" ގެ ޝޫޓިން ފަށައިފި ކަމަށް މީޑިއާތަކުން ރިޕޯޓު ކޮށްފިއެވެ.

ބޮލީވުޑު ހަންގާމާގައިވާ ރިޕޯޓެއްގައި ބުނެފައިވަނީ ދާދި ފަހުން ސަލްމާނުގެ މޭކަށްޓަށް ލިބުނު އަނިޔާއެއްގެ ސަބަބުން އޭނާގެ ކުރިއަށް އޮތް ފިލްމު "ސިކަންދަރު" ގެ ޝޫޓިން މެދުކަނޑާފައިވީނަމަވެސް އޭނާގެ މޭކަށި އެއްކޮށް ރަނގަޅުނުވަނީސް އަނެއްކާ ފިލްމުގެ ޝޫޓިން ފަށާފައިވާ ކަމަށެވެ. އަދި މި ފިލްމުގެ މުމްބާއީގެ ޝޫޓުތައް ނިމުމުން ފިލްމުގެ ބައެއް މަންޒަރުތައް ހައިދްރަބާދުގައި ޝޫޓު ކުރާނެ ކަމަށާއި، ފިލްމު ޝޫޓު ކުރުމަށް ހައިދްރަބާދުން ތަނެއް ހޯދަމުންދާކަމަށްވެސް ރިޕޯޓުގައި ވެއެވެ.

ގިނަ ބަޔަކު އިންތިޒާރު ކުރަމުންދާ މި ފިލްމު ޕްރޮޑިއުސް ކުރަނީ ސާޖިދު ނާދިއަދްވާލާއެވެ. މި ފިލްމުގެ މުހިންމު ރޯލުތަކުން ސަލްމާނުގެ އިތުރުން ރަޝްމިކާ މަންދައްނާ އާއި ސަތިޔަރާޖު އާއި ޕްރަތީކު ބައްބަރު ފެންނާނެއެވެ. މި ފިލްމަކީ ބޮޑު ބަޖެޓަކާއެކު އުފައްދާ ފިލްމަކަށްވީއިރު މި ފިލްމު ނެރުމަށް ހަމަޖެހިފައިވަނީ އަންނަ އަހަރުގެ އީދުގައި ކަމަށް ރިޕޯޓުތަކުގައި ވެއެވެ.

އިންޑިއާގެ ސިނަމާއަށް އެތައް ހިދުމަތްތަކެއް ކޮށްދީފައިވާ ސަލްމާނު އަކީ ދުނިޭގެ އެކި ކަންކޮޅުތަކުގެ މީހުންގެ މެދުގައި މަގުބޫލުކަން ހޯދާފައިވާ ތަރިއެކެވެ. އޭނާގެ ބައެއް މަޝްހޫރު ފިލްމުތަމުގެ ތެރޭގައި "މޭނޭ ޕްޔާރު ކިޔާ" އާއި "ހީރޯސް" ފަދަ ފިލްމުތައް ހިމެނެއެވެ.