ޒަކާތު ފަންޑަށް މިހާތަނަށް 77 މިލިއަން ރުފިޔާ ލިބިފައިވާ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. ޝަހީމް އަލީ ސައީދު ވިދާޅުވެއްޖެއެވެ.

ވަޒީރު ޝަހީމް ވިދާޅުވީ މި އަހަރުގެ މިހާތަަނަށް ޒަކާތު ފަންޑަށް 77 މިލިއަން ރުފިޔާ ލިބިފައިވާ ކަމަށާއި އަމާޒަކީ އަންނަ އަހަރު އެ އަދަދު 100 މިލިއަން ރުފިޔާއަށް އިތުރުކުރުން ކަމަށެވެ.

ޝަހީމް މިއަދު ވިދާޅުވީ، ޒަކާތަށް ހޭލުންތެރިކަން އިތުރުކުރުމަށް ވަރަށް ގިނަ މަސައްކަތްތަކެއް ކުރެވުނު ކަމަށާއި އެ މަސައްކަތްތައް ވަރަށް ކާމިޔާބު ކަމަށެވެ. އެގޮތުން ހޭލުންތެރިކަމުގެ 59 ހަރަކާތެއް ކުރިއަށް ގެންގޮސްފައިވާކަން ވަޒީރު ފާހަގަކުރެއްވިއެވެ.

އެހެން އަހަރުތަކާއި ބަލާއިރު ޒަކާތު ފަންޑަށް މި އަހަރު 11 އިންސައްތަ ކުރިއެރުން ލިބިފައިވާ ކަމަށް ވަޒީރު ވިދާޅުވިއެވެ. އަދި ޒަކާތު ފަންޑު 100 މިލިއަނަށް އިތުރުކުރެވިއްޖެނަމަ އެއީ ޒަކާތުގެ ތާރީހު ރާއްޖޭގައި ބަދަލުކޮށްލެވުން ކަމަށް ވަޒީރު ވިދާޅުވިއެވެ.

ފަގީރުންގެ ދަފްތަރުގައި މިހާތަނަށް 3884 މީހުން ރަޖިސްޓްރީކޮށްފައިވާއިރު މި އަހަރު ވުޒާރާއިން ވަނީ ބޮލަކަށް 4000 ރުފިޔާ، ޒަކާތުގެ ގޮތުގައި ބަހާފައެވެ.

ޒަކާތު ފަންޑުން ބޭސްފަރުވާގެ ހަތަރު ކަމަކަށް ވަނީ އެހީ ފޯރުކޮށްދީފައެވެ. އެގޮތުން ކެންސަރު ބައްޔާއި، ހިތުގެ އޮޕަރޭޝަން، ކިޑްނީ ބަލިތަކާއި، ސިކުނޑީގެ އޮޕަރޭޝަން ހިމެނެއެވެ. މީގެ އިތުރުން އެހެނިހެން ކަންކަމަށް ވެސް ޒަކާތު ފަންޑުން ވަނީ އެހީ ދީފައިކަން ފާހަގަ ކުރެވެއެވެ.