ބޮލީވުޑްގެ މަޝްހޫރު ތަރި އަބީޝެކް ބައްޗަން ގެ ކުރިއަށް އޮތް ފިލްމު "ބީ ހެޕީ" ގެ ފުރަތަމަ ޕޯސްޓަރު ދައްކައިފިއެވެ.

އެގޮތުން ޕްރައިމް ވީޑިއޯގެ އިންސްޓަގްރާމު ޕޭޖުގައި އަބިޝެކުގެ ފިލްމު "ބީ ހެޕީ" ގެ ފުރަތަމަ ޕޯސްޓަރު ދައްކާފައިވާއިރު، އޭގައި ފިލްމުގެ ލީޑު ތަރިން ކަމަށްވާ އަބިޝެކް އާއި އިނާޔަތު ކޮންޓެމްޕޮރަރީ ޑާންސް ސްޓެޕެއް ޖައްސާތަން ފެނިގެންދެއެވެ. މި ފިލްމަކީ ޕްރައިމް ވީޑިއޯސް އިން ނެރޭ ފިލްމަކަށް ވީއިރު، ފިލްމު ނެރޭ ދުވަހެއް އަދި އެނގިފައި ނުވާކަމަށް ރިޕޯޓުގައި ވެއެވެ.

ރެމޯ ޑި ސޫޒާ ޑައިރެކްޓު ކުރާ މި ފިލްމުގެ ވާހަކަ ބިނާވެފައިވަނީ ބައްޕަޔަކު އޭނާގެ ދަރިފުޅުގެ ހުވަފެންތައް ހަގީގަތަކަށް ހަދައިދިނުމަށްޓަކައި ކުރާ ބުރަ މަސައްކަތުގެ މައްޗަށެވެ. މި ފިލްމުގެ މުހިންމު ރޯލުތަކުން އަބިޝެކް އާއި އިނާޔަތުގެ އިތުރުން ނޯރާ ފަތޭހީ އާއި ނައްސަރު އާއި، ޖޯނީ ލެވާރ ގެ އިތުރުން ހަރުލީން ސެތީ ފެންނާނެއެވެ.

ފިލްމު "ބީ ހެޕީ" ގައި އަބީޝެކު ކުޅޭނީ އިނާޔަތުގެ ބައްޕަގެ ރޯލެވެ.