ކޯވިޑް-19 ވައިރަހުގައި ޗައިނާއިން މަރުވި މީހުންގެ ހަނދާނުގައި އެ ގައުމު ހުއްޓުމަކަށް ގެނެސް 3 މިނެޓުގެ ހަމަހިމޭންކަމުގެ ސުކޫތެއް ގެނެސްފިއެވެ.

ޗައިނާ ގަޑިން ހޮނިހިރު ދުވަހުގެ ހެނދުނު 10:00 ގައި ގެނައި މި ހަމަހިމޭންކަމުގެ ސުކޫތަކީ، ދުނިޔޭގައި މިހާރު ފެތުރެމުން ދާ ނުރައްކާތެރި ކޮރޯނާވައިރަހާއި ހަނގުރާމަކޮށް ބަލީގައި މަރުވި 3326 މީހުންގެ ހަނދާނުގައި ގެނައި ސުކޫތެކެވެ.

މިގޮތުން، ގައުމުގެ ހުރިހާ މީހުން ޝާމިލުވާގޮތަށް ގެނައި މި ސުކޫތަށް ނިމުމެއް ގެނައީ ޗައިނާގެ ދިދަ ބައިދަނޑިއަށް ތިރިކޮށް، މަރުވި ފަރާތްތަކުގެ ހަނދާން އައު ކުރުމާއެކުގައެވެ.

ދުނިޔޭގައި ކޯވިޑް-19ގެ ރޯގަ ބަލިމަޑުކަން ފުރަތަމަ ފެތުރެން ފަށާފައިވަނީ މިދިޔަ އަހަރުގެ ޑިސެންބަރު މަހު ޗައިނާގެ ވޫހާން ސިޓީއިން ނެވެ. މިހާރު ދުނިޔޭގެ 181 ގައުމަކުން 1,120,099 މީހަކަށް މި ބަލި ވަނީ ޖެހިފައެވެ.