ހޮލީވުޑްގެ މަޝްހޫރު ތަރި ޓޮމް ހޮލެންޑު ލީޑު ރޯލުން ފެނިގެންދާ ފިލްމު "ސްޕައިޑަމޭން 4" ނެރެން ހަމަޖެހިފައިވާ ތާރީޚު ހާމަކޮށްފިއެވެ.

ވެރައިޓީއިން ރިޕޯޓު ކޮށްފައިވާ ގޮތުގައި ސްޕައިޑަމޭން ސީކުއެލްގެ ކުރިއަށް އޮތް ފިލްމު "ސްފައިޑަމޭން 4" ފިލްމު ނެރުމަށް ހަމަޖެހިފައިވަނީ 2026 ގެ ޖުލައި 24 ގައެވެ. އަދި މި ފިލްމުގެ މަންޒަރުތައް ޝޫޓު ކުރުމުގެ މަސައްކަތް އަންނަ އަހަރު މެދުތެރޭގައި ފެށޭނެ ކަމަށްވެސް ޓޮމް ހޮލެންޑާ ހަވާލާދީ ވަނީ ރިޕޯޓު ކޮށްފައެވެ.

"އަންނަ ހޫނު މޫސުމު ގައި ޝޫޓު ކުރަން ފަށާނެ، ހުރިހާ ކަމެއްވެސް ދަނީ ރަނގަޅަށް. ވަރަށް ކެއްމަދުވެފަ މިހުންނަނީ ޝޫޓިން ފަށަން" ޓޮމް ހޮލެންޑު ވަނީ އިންޓަވިއުއެއްގައި ބުނެފައެވެ.

ޓޮމް ހޮލެންޑު ވަނީ މީގެ ކުރިން ނެރެފައިވާ ސްޕައިޑަމޭން ފިލްމު ތަކުގައިވެސް ޕީޓާ ޕާކާގެ ރޯލު ކުޅެފައެވެ. ސްފައިޑަމޭން ސީކުއެލްގެ ކުރިއަށް އޮތް ފިލްމުގައިވެސް ޓޮމް ހޮލެންޑު އޭނާގެ ޕީޓާ ޕާކާގެ ކެރެކްޓަރުގެ ގޮތުގައި ފެންނާނެ ކަމަށް މީޑިއާތަކަށް ވަނީ ޔަގީންވެފައެވެ. ނަމަވެސް ޒެންޑާޔާ އެމްޖޭ ކެރެކްޓަރުގެ ގޮތުގައި ފެންނާނެ ކަމުގެ ޔަގީންކަމެއް އަދި މީޑިއާތަކަށް ލިބިފައެއް ނުވެއެވެ.

"ސްފައިޑަމޭން 4" އަށް އަންނަ އެންމެ ބޮޑު އެއް ބަދަލަކީ މި ފިލްމުގެ ޑައިރެކްޓަރު ބަދަލުވެފައި ވުމެވެ. މީގެ ކުރީގައި އުފެއްދި ހުރިހާ ސްޕައިޑަމޭން ފިލްމެއްވެސް ޑައިރެކްޓު ކޮށްފައިވަނީ ޖޯން ވަޓްސްއެވެ. ނަމަވެސް "ސްޕައިޑަމޭން 4" ޑައިރެކްޓު ކުރާނީ ޑެނިއަލް ޑެސްޓިން ކްރޭޓޮން އެވެ. ޑެނިއެލް ވަނީ މީގެ ކުރީގައި ވަރަށް ގިނަ މާވެލް ޕްރޮޖެކްޓުތަކުގައި މަސައްކަތް ކޮށްފައެވެ. އޭގެ ތެރޭގައި "ވޮންޑާ ވުމެން" އާއި މިހާރު އުފައްދަމުންދާ ސީކުއެލް "ޝަންގް ޗީ" ހިމެނެއެވެ. ނަމަވެސް މިހާރު ޑެނިއަލް މެން އެންމެ ސަމާލުކަން ދީގެން މަސައްކަތް ކުރަމުންދާ ޕްރޮޖެކްޓަކީ "ސްޕައިޑަމޭން 4" ކަމަށް ރިޕޯޓުގައި ވެއެވެ.

އެންމެ ގިނަ މީހުން ގަޔާވާ ސްޕައިޑަމޭން ކެރެކްޓަރު އަޅުގަނޑުމެންނަށް ފޯރުކޮށްދީ، އެތައް ބައެއްގެ މަގުބޫލުކަން ހޯދި ޓޮމް ހޮލެންޑު އެންމެ ފަހުން ފެނިފައިވަނީ އެޕަލް ޓީވީ ޕްލަސްގެ ސީރީސް އެއް ކަމަށްވާ "ދަ ކްރައުޑެޑް ރޫމް" އިންނެވެ.