އެއްވެސް މީހެއްގެ މައްޗަށް ބުރަ ހިތެއް ނެތް ކަމަށް ހޮލީވުޑްގެ މަޝްހޫރު ތަރި ޖޯނީ ޑެޕް ބުނެފިއެވެ.

ޖޯނީ މިހެން ބުނެފައިވަނީ އޭނާގެ ކުރިއަށް އޮތް ފިލްމު "މޯދީ: ޑޭއިސް އޮން ދަ ވިންގްސް އޮފް މޭޑްނެސް" އާ ގުޅޭ ގޮތުން ދަ ހޮލީވުޑް ރިޕޯޓާއަށް ދިން އިންޓަވިއުއެއްގައެވެ. އެގޮތުން މި އިންޓަވިއުގައި އޭނާ ބުނެފައިވަނީ މާޒީވެ ގޮސްފައިވާ ކަންތައް ހަނދާން ނައްތާލައި ކުރިއަށް ދާން ތައްޔާރަށް ހުރި ކަމަށާއި، މި ފިލްމަކީ އެކަމަށް އެޅޭ ފުރަތަމަ ފިޔަވަޅު ކަމަށެވެ.

އޭނާ އިތުރަށް ބުނެފައިވަނީ ފާއިތުވި އަހަރުތަކުގައި އޭނާގެ ޒާތީ ދިރިއުޅުމަށް މީޑިއާގެ ބޮޑު ސަމާލުކަމެއް ލިބިގެންދިޔައިރު އެންމެންވެސް ތިބީ އޭނާއާ ދެކޮޅަށް ކަމަށެވެ. ނަމަވެސް އެއިން އެއްވެސް މީހެއްގެ މައްޗަށް ބުރަ ހިތެއް ނެތްކަމަށް އޭނާ ވަނީ މި އިންޓަވިއުގައި ބުނެފައެވެ.

"ތެދަށްބުނާނަމަ މީޑިއާތަކުން އަހަންނާ ދެކޮޅަށް ދެއްކި ހުރިހާ ވާހަކައެއްވެސް ހަނދާން އެބަހުރި، އަހަރެން އެހުރިހާ ކަމެއްގެ ތެރޭގައިވެސް އުޅުނިން. އެކަމަަކު އެއްވެސް މީހަކަށް ބުރަ ހިތެއް ނެތް. ރުޅި އައިސް ހުންނަން ވެއްޖެއްޔާ ހަމަ މީހާ ހަލާކުވާނީ" ޖޯނީ ވަނީ އިންޓަވިއުގައި ބުނެފައެވެ.

ޖޯނީގެ ކުރިއަށް އޮތް ފިލްމު ބިނާވެފައިވަނީ އިޓަލީގެ އާޓިސްޓެއް ކަމަށްވާ އަމީޑިއޯ މޮޑިގްލިއާނީގެ ދިރިއުޅުމުގެ މައްޗަށެވެ. ޖޯނީ އެންމެ ފަހުން ފެނިފައިވަނީ މިއަހަރު ކުރީކޮޅު ނެރުނު ފިލްމު "ޖޯން ޑޫ ބެރީ" އިންނެވެ.