ރާއްޖެއަށް ޑިޖިޓަލް ކަރަންސީ ތަޢާރަފުކުރުމަށްޓަކައި ކުރަންޖެހޭ މަސައްކަތްތައް މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިހާރު ފަށާފައި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ދިވެހިރާއްޖޭގެ ޤައުމީ ޔުނިވަރސިޓީގެ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅުދައްކަވަމުން ރައީސް ވިދާޅުވީ 2030 އާ ހަމައަށް ދާންވާ އިރަށް ރާއްޖޭގެ އިޤްތިސާދުގެ ޖީޑީޕީގައި ޑިޖިޓަލް އިކޮނޮމީ ހިއްސާވާ މިންވަރު %15 އަށް ހެދުމަށް ސަރުކާރުން އަމާޒުހިފާފައިވާ ކަމަށެވެ.

ޑިޖިޓަލް އިކޮނޮމީއަށް މަގުފަހިކުރުމަށްޓަކައި ކްރިޕްޓޯ ކަރަންސީ ނުވަތަ ޑިޖިޓަލް ކަރަންސީ ރާއްޖެއަށް ތަޢާރަފުކުރުމަށްޓަކައި ކުރަންޖެހޭ މަސައްކަތްތައް އެމްއެމްއޭއިން މިހާރު ފަށާފައިވާކަމަށް ރައީސް ވިދާޅުވިއެވެ.

”ކްރިޕްޓޯ ކަރަންސީ، ޑިޖިޓަލް ކަރަންސީ ރާއްޖެއަށް ގެނައުމަށް އޭގެ ހުރިހާ ޤާނޫނީ ކަންތައްތަކަށްވެސް ފަރުވާ ލިބޭގޮތަށް ޚާއްސަ ޤާނޫނު ހަދައިގެން އަދިވެސް ދެން ހުންނަ އިންޓަރނޭޝަނަލް ބެސްޓް ޕްރެކްޓިކްސްތަކާ އެއްގޮތަށް ރާއްޖޭގައި ޑިޖިޓަލް ކަރަންސީ ފުޅާކުރުމަށް.“ މަސައްކަތްކުރައްވާނެ ކަމަށް ރައީސް މުޢިއްޒު ވިދާޅުވިއެވެ.

ޑިޖިޓަލް ކަރަންސީ ރާއްޖެއަށް ގެނައުމުން ކިޔަވައިގެން ނިކުންނަ ޒުވާނުންނާއި އެކިއެކި ފަންނުވެރިން ރާއްޖޭގެ އިޤްތިސާދުގައި ހަރަކާތްތެރިވުމަށް ހުރި ފުރުޞަތުތައް އިތުރުވާނެ ކަމަށް ރައީސް ވިދާޅުވިއެވެ.

މިއަދު އެމްއެންޔޫގައި ބޭއްވި ރަސްމިއްޔާތުގައި ރައީސް ވަނީ އާޓިފިޝަލް އިންޓެލިޖެންސްގެ ދާއިރާއިން ދުނިޔޭގެ މައިދާނުގައި އެންމެ ކުރީ ސަފުގައި ހިމެނޭ ޤައުމަކަށް ދިވެހިރާއްޖެ ހެދުމަކީ ސަރުކާރުގެ އަމާޒުކަމަށްވެސް ވިދާޅުވެފައެވެ.