ދަރުމަވަންތަ ހޮސްޕިޓަލު އަންނަ ހޮނިހިރު ދުވަހު ރަސްމީކޮށް ހުޅުވަން ނިންމާފައިވާކަން ރައީސް ޑރ. މުހައްމަދު މުއިއްޒު އިއުލާންކުރައްވައިފި އެވެ.

ރޭ ދަރުބާރުގޭގައި ބޭއްވި ޖުމްހޫރީ ދުވަހުގެ ޖަލްސާގައި ރައީސް މުއިއްޒު ވިދާޅުވީ އަންނަ އަހަރުގެ ބެޖެޓުގައި އެންމެ ބޮޑު އިސްކަމެއް ދޭނެ އެއް ދާއިރާއަކީ ސިއްހީ ދާއިރާ ކަމަށެވެ.

އެގޮތުން އަންނަ އަަހަރު ސިއްހީ ދާއިރާއާ ގުޅޭ ވަރަށް ގިނަ މަޝްރޫއުތައް ކުރިއަށް ގެންދަން ނިންމާފައިވާ ކަމަށް ރައީސް ވިދާޅުވި އެވެ.

ހަމަ އެހެންމެ މި ސަރުކާރަށް މިވީ އަހަރެއްހާ ދުވަހުގެ ތެރޭގައި ވެސް ގިނަ މަސައްކަތްތަކެއް ކުރެވިފައިވާކަން އެމަނިކުފާނު ފާހަގަ ކުރެއްވި އެވެ. އެގޮތުން ޒުވާުނުންގެ ތެރެއިން ވަރަށް ގިނަ ބަޔަކަށް ބޭނުންވާނެ މެންޓަލް ހެލްތު ލައިންއެއް ވެސް މިހާރު ގާއިމުކޮށްފައިވާ ކަމަށް ރައީސް ވިދާޅުވިއެވެ.

ރައީސް ވިދާޅުވީ ދަރަމަވަންތަ ހޮސްޕިޓަލަކީ ހޮހޮޅައެއް ކަަމަށް ބައެއް ފަރާތްތަކުން ކުރިން ބުނެ ހެދި ކަމަށެވެ. އެހެން ނަމަވެސް މިހާރު އެ ތަނަށް ބޭނުންވާ ހުރިހާ ފެސިލިޓީއެއް ގާއިމުކުރަމުންދާކަން ރައީސް ފާހަގަ ކުރެއްވި އެވެ.

"ނޮވެމްބަރު 16ގައި އަޅުގަނޑުމެން ޓާޝަރީ ހޮސްޕިޓަލަކަށް ހަދައި އެ ތަނަށް ބޭނުންވާ ހުރިހާ ހިދުމަތްތަކެއް ގާއިމުކޮށް ދަރުމަވަންތަ ހަގީގީ ހޮސްޕިޓަލެއްގެ ގޮތުގައި ހުރިހާ ފެސިލިޓީއެއް ގާއިމުކޮށްފަ ނޮވެމްބަރު 16ގައި އަަޅުގަނޑުމެން ހުޅުވާނަން." ރައީސް ވިދާޅުވި އެވެ.

ދަރުމަވަންތަ ހޮސްޕިޓަލު ހަދަން ފެށީ ކުރީގެ ރަައީސް އަބްދުﷲ ޔާމީންގެ ވެރިކަމުގަ އެވެ. އަދި އެ ހޮސްޕިޓަލުގެ ބޮޑު ބައި ރައީސް ޔާމީންގެ ވެރިކަމުގައި ނިންމި ނަމަވެސް ހިދުމަތް ދޭން ފެށީ ނިމިގެން ދިޔަ ސަރުކާރުގަ އެވެ.