އައިލެންޑް އޭވިއޭޝަން ސާވިސް (އައިއޭއެސް)ގެ ޑެޕިއުޓީ މެނޭޖިން ޑިރެކްޓަރު (ޑީއެމްޑީ)ގެ މަގާމުގައި ކުރިން ހުންނެވި އައިޝަތު ޖެނިފާއަށް އެ މަގާމު އަނބުރާ ދޭން ވަޒީފާއާ ބެހޭ ޓްރައިބިއުނަލުން އެންގި މައްސަލަ ހައިކޯޓުގައި އިސްތިއުނާފްކޮށްފި އެވެ.

އެމްޑީޕީގެ އެކްޓިވިސްޓެއްގެ ގޮތުގައި ކުރިން މަޝްހޫރުވެފައިވާ ޖެނީފާ މަގާމުން ވަކިކުރީ މިހާރުގެ ސަރުކާރުން ވެރިކަަމަށް އައުމަށް ފަހު މިދިޔަ ޑިސެމްބަރު މަހު އެވެ. ނަމަވެސް މިދިޔަ މަހު ވަޒީފާއާ ބެހޭ ޓްރައިބިިއުނަލުން ވަނީ ޖެނީފާ މަގާމުން ވަކިކުރީ ގޯސްކޮށްކަމަށް ނިންމައި އޭނާއަށް ވަޒީފާއާއި، މާލީގޮތުން ލިބުނު ގެއްލުމުގެ ބަދަލު ނަގައިދިނުމަށް އައިއޭއެސްއަށް އަންގައިފައެވެ.

އެކަމަކު އެ މައްސަލަ މިދިޔަ ހަފްތާގައި އައިލެންޑް އޭވިއޭޝަނުން ވަނީ ހައިކޯޓުގައި އިސްތިއުނާފްކޮށްފަ އެވެ.

އެ މައްސަލަ ހައިކޯޓަށް ހުށަހެޅި ނަމަވެސް އެ މައްސަލަ ބަލައިގަތުމާމެދު ހައިކޯޓުން އަދި ވަކި ގޮތެއް ނުނިންމަ އެވެ.

އައިލެންޑް އޭވިއޭޝަނުން ބުނެފައިވާ ގޮތުގައި ޖެނީފާ ރިޓަޔަރ ކުރުމުގެ ފުރުސަތު އޭނާއަށް އެ ކުންފުނިން ދިނެވެ. ނަމަވެސް، އޭނާ މަގާމުން ވަކިކުރަން ބޯޑުން ނިންމީ އެ ނިންމުމާ ދެކޮޅު ހެދުމުންކަން ފާހަގަކޮށްފައި ވެއެވެ.

އަދި އައިއޭއެސްއިން ފާހަގަކޮށްފައިވާ ގޮތުގައި ޑީއެމްޑީގެ މަގާމަކީ އެ ކުންފުނީގައި މީގެކުރިން އޮންނަ މަގާމެއް ނޫން ކަމަށާއި ޖެނިފާއަށް ވަޒީފާ ދީފައި ވަނީ މަގާމު އުފެއްދުމަށްފަހު ކަމަށް އެ ކުންފުނިން ވަނީ ބުނެފައެވެ.