ނިރުބަވެރި އިސްރާއީލުން އަނެއްކާވެސް ލުބުނާނުގެ ކުށެއް ނެތް 11 މީހަކު މަރާލައިފިއެވެ.

ހަނގުރާމަ މަޑުޖައްސާލާނެ ކަމަށް ބުނެ އޮޅުވާލުމަށް ފަހު އިސްރާއީލުން ދަނީ އަދިވެސް ހުއްޓުމެއްނެތި ލުބުނާނުގައި ލާއިންސާނީ އަމަލުތައް ހިންގަމުންނެވެ. ލުބުނާނުގެ ސިއްހަތާ ބެހޭ ވުޒާރާއާ ހަވާލާދީ ބޭރުގެ މީޑިޔާތަކުން ރިޕޯޓުކުރާގޮތުގައި ފާއިތުވި 24 ގަޑިއިރު އެކަނިވެސް އިސްރާއީލުގެ ސިފައިން ވަނީ އެގައުމުގެ އެކި ސަރަހައްދުތަކަށް ހަމަލާދީ 11 މީހަކު މަރާލާފައެވެ.

އިސްރާއީލުގެ އަސްކަރިއްޔާއާއި ހިޒްބުالله ގެ މުޖާހިދުންނާ ހަމަލާތައް ބަދަލުކުރެވެމުންދާއިރު މިހާރު ގިނަ ހަމަލާތައް ކުރިޔަށް ދަނީ ލުބުނާނުގެ ދެކުނުގެ ސަރަހައްދުތަކުގައެވެ.

މި ހަނގުރާމަ މަޑުޖައްސާލާނެ ކަމަށް ޔަހޫދީ އިސްރާއީލުން ބުނީ މިދިޔަ ހަފްތާގައެވެ.

އިސްރާއީލުގެ އަސްކަރިއްޔާއިން މެދުއިރުމަތީގެ ގައުމުތަކަށް އަރައި ދެމުންދާ ހަމަލާތަކުގެ ތެރެއިން ޣައްޒާއަށް ދެމުންދާ ހަމަލާތައްވެސް އަދިވެސް ނުހުއްޓި ކުރިޔަށް ދާކަން ފާހަގަ ކުރެވެއެވެ.

ޣައްޒާގެ މެދުތެރެއާއި އުތުރުގެ ސަރަހައްދަށް ނިރުބަވެރިން ދިން ހަމަލާތަކުގައި މަދުވެގެން ނުވަ މީހަކު ވަނީ މަރުވެފައެވެ. އަދި އެ ސިޓީގެ ދެކުނު ޚާން ޔޫނިސްގެ ބައެއް ހިސާބުތަކުގައި ތިބި ފަލަސްތީނުގެ ރައްޔިތުންނަށް މަޖުބޫރުކޮށްގެން ގެދޮރު ދޫކޮށްލުމަށް އާ އަމުރުތަކެއް ވެސް ވަނީ ނެރެފައެވެ.

ޣައްޒާގައި އިސްރާއީލުން ހިނގި ނަސްލު ނައްތާލުމުގައި އޮކްޓޯބަރު 7، 2023 އިން ފެށިގެން މަދުވެގެން 44،466 ފަލަސްތީނު މީހުން މަރުވެ 105،358 މީހުން ޒަޚަމްވެފައިވެއެވެ. އެ ދުވަހު ހަމާސް އިސްވެ އޮވެ ދިން ހަމަލާތަކުގައި އިސްރާއީލުގައި މަދުވެގެން 1،139 މީހުން މަރުވެ، 200 އަށް ވުރެ ގިނަ މީހުން އަޅުވެތިކޮށްފައިވެ އެވެ.

ލުބުނާނުގައި ހަނގުރާމަ ފެށިފަހުން އިސްރާއީލުން ދިން ހަމަލާތަކުގައި 3،961 މީހުން މަރުވެ 16،520 މީހުން ޒަޚަމްވެފައިވެއެވެ.