މަސްވެރިންނަށް އެސްޓީއޯ ރޭޓްގައި ތެޔޮ ވިއްކަން ފަށައިފި އެވެ.

އެސްޓީއޯއިން މިއަދު ނެރުނު ބަޔާނުގައި ބުނީ ރާއްޖޭގެ ކޮންމެ އަތޮޅެއްގެ މަދުވެގެން އެއް ރަށުން "އެސްޓީއޯ ރޭޓް" ގައި، ފިޝަރީޒް މިނިސްޓްރީގެ "ފަހި ހަކަތަ" ޕޯޓަލް މެދުވެރިކޮށް މަސްވެރިންނަށް ތެޔޮ ލިބޭނެ އިންތިޒާމުތައް ހަމަޖައްސަން މަސައްކަތް ފަށާފައިވާ ކަމަށެވެ.

މިއީ މަސްވެރިންނަށް ހެޔޮ އަގުގައި ތެޔޮ ފޯރުކޮށްދިނުމަށް ސަރުކާރުން ގެންގުޅޭ ސިޔާސަތުގެ ދަށުން، ކުރަމުން ގެންދާކަމެއް ކަމަށް އެސްޓީއޯއިން ބުނެފައި ވެއެވެ.

އެގޮތުން ހުޅުމާލެ ކަންނެލި ޖެޓީގެ އިތުރުން، ކ. ހިންމަފުށި، ޅ. ފެލިވަރު، ގއ. ކޫއްޑޫ، އަދި ސ. ހުޅުމީދޫއިން، އެސްޓީއޯ ރޭޓުގައި މަސްވެރިންނަށް ތެޔޮ ވިއްކަން މިހާރު ފަށާފައިވާ ކަމަށް ވެސް އެސްޓީއޯއިން ބުނެފައި ވެއެވެ.

އަދި އަންނަ އަހަރުގެ ނިޔަލަށް ރާއްޖޭގެ ކޮންމެ އަތޮޅެއްގައި ފިއުލް ސްޓޯރޭޖް ގާއިމްކޮށް، އެސްޓީއޯ ރޭޓްގައި ތެޔޮ ލިބޭނޭ އިންތިޒާމް ހަމަޖެއްސުމަށް މަސައްކަތް ކުރަމުންދާ ކަމަށް ވެސް އެސްޓީއޯއިން ބުނެފައި ވެއެވެ.

ރާއްޖޭގެ ހުރިހާ އަތޮޅެއްގައި، މަދުވެގެން އެއް ރަށުން އެސްޓީއޯ ރޭޓުގައި ތެޔޮ ފޯރުކޮށްދޭ ނިޒާމެއް ގާއިމު ކުރުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވައުދެކެވެ.