ރާއްޖޭގައި މަސައްކަތްކުރާ ބިދޭސީންގެ މަޢުލޫމާތު، ސައްތައިން ސައްތަ ބައޯމެޓްރިކަލީ ކަށަވަރުކުރުމަށް، ކުރިއަށްގެންދާ ކުރަނގި އޮޕްރޭޝަންގައި މިހާތަނަށް 18919 ބިދޭސީންގެ މައުލޫމާތު ނަގައިފިއެވެ.

3 މަރުހަލާއަށް ބަހާލައިގެން މުޅި ރާއްޖޭގައި 3 އަހަރަށް ކުރިއަށް ގެންދާ އޮޕަރޭޝަން ކުރަނގި އިފްތިތާޙް ކޮށްފައިވަނީ 2 މެއި 2024 ވީ ބުރާސްފަތި ދުވަހު ކ. ހިންމަފުށީގައެވެ.

ދާޚިލީ ވުޒާރާއިން ބުނީ މިހާތަނަށް 18919 ބިދޭސީންގެ ބަޔޯމެޓްރިކް ޑޭޓާ އެއްކޮށްފައިވާ ކަމަށާއި، އަދި 194 ރަށެއްގައި މި މަސައްކަތް ފަށާފައިވާ ކަމަށެވެ. އަދި އޭގެ ތެރެއިން 50 ރަށެއްގެ މަސައްކަތް ނިންމާފައިވާ ކަމަށްވެސް ދާޚިލީ ވުޒާރާއިން ހާމަކޮށްފައިވެއެވެ.

މި އޮޕަރޭޝަންގެ ފުރަތަމަ އަހަރު ކުރަން ނިންމާފައިވާ މަސައްކަތަކީ ރާއްޖޭގެ އެކި ކަންކޮޅުތަކުގައި ގަވާއިދާ ހިލާފަށް އުޅޭ ބިދޭސީން ދާޚިލީ ވުޒާރާގެ ސިސްޓަމްގެ ތެރެއަށް ގެނައުމުގެ މަސައްކަތެވެ. އަދި އެ މަސައްކަތް ނިމޭއިރު ރާއްޖޭގައި ތިބީ ކޮން ގައުމުތަކެއްގެ ބިދޭސީންނެއް ކަމާއި، މަސައްކަތް ކުރާތަން ފަދަ ހުރިހާ މައުލޫމާތެއް ސިސްޓަމަށް ނަގާނެއެވެ.

އަދި ޖެހިގެން އަންނަ ދެ އަހަރު މަސައްކަތް ކުރާނީ ރަސްމީ ލިޔެކިޔުންތައް ނެތް، ސިސްޓަމް ތެރެއަށް ނުގެނެވޭ މީހުން ރާއްޖޭން ބޭރުކުރުމަށް ކަމަށް ދާޚިލީ ވުޒާރާއިން ވަނީ ހާމަކޮށްފައެވެ.

އޮޕަރޭޝަން ކުރަނގީގެ މަސައްކަތް މިސަރުކާރުން ފަށާފައިވާއިރު ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ އަދަދު މިހާތަނަށް އެއްވެސް ސަރުކާރަކަށް ހޯދިފައެއް ނުވެއެވެ.

މިއަހަރުގެ މަސައްކަތްތެރިންގެ ދުވަހުގެ މުނާސަބާގައި ރައީސް ޑރ. މުހައްމަދު މުއިއްޒު ދެއްވި ހާއްސަ ހިޠާބުގައި ޖިނާއީ ކުށްތަކަށް އަރައިގެންފައިވާ ބިދޭސީން 48 ގަޑީރުތެރޭ ޑީޕޯޓް ކުރާނެ ކަމަށް ވަނީ ވިދާޅުވެފައެވެ.