ޑިސެންބަރުމަހުގެ މިހާތަނަށް ރާއްޖެއަށް ލައްކައަކަށްވުރެ ގިނަ ފަތުރުވެރިން ޒިޔާރަތްކޮށްފައިވާކަމަށް ފަތުރުވެރިކަމާ ބެހޭ ވުޒާރާގެ ތަފާސް ހިސާބުތަކުން ހާމަވެއްޖެއެވެ.



ފަތުރުވެރިކަމާއި ބެހޭ ވުޒާރާގެ އެންމެ ފަހުގެ ތަފާސްހިސާބުތައް ދައްކާގޮތުން މިހިނގާ ޑިސެންބަރުމަހުގެ ފުރަތަމަ 17 ދުވަސްތެރޭ ރާއްޖެއަށް 103،560 ފަތުރުވެރިން ވަނީ ޒިޔާރަތްކޮށްފައެވެ. މިއީ ފާއިތުވި އަހަރުގެ ޑިސެމްބަރު މަހުގެ ފުރަތަމަ 17 ދުވަހާ އަޅާ ބަލާއިރު 2.9 އިންސައްތަ އިތުރު އަދަދެކެވެ.

މިދިޔަ އަހަރުގެ ޑިސެންބަރުމަހުގެ ފުރަތަމަ 17 ދުވަސްތެރޭ ރާއްޖެއަށް އައިސްފައިވަނީ 100،652 ފަތުރުވެރިންނެވެ.
ވުޒާރާގެ ތަފާސްހިސާބުތައް ދައްކާގޮތުން އެވްރެޖްކޮށް ކޮންމެ ދުވަހަކު މިހާރު ރާއްޖެއަށް 6092 ފަތުރުވެރިން އާދެއެވެ. މިމަހުގެ ކުރީކޮޅު ރާއްޖެއަށް ކޮންމެ ދުވަހަކު އަންނަ ފަތުރުވެރިންގެ އަދަދުތައް ހުރީ 5000 ގައެވެ.

ރާއްޖެއަށް ޒިޔާރަތްކުރާ ފަތުރުވެރިންގެ ޖުމްލަ އަދަދަށް ބަލާއިރު، މި އަހަރުގެ މިހާތަނަށް ވަނީ 1.9 މިލިޔަން ފަތުރުވެރިން ޒިޔާރަތްކޮށްފައެވެ. އެއީ މިދިޔަ އަހަރާ އަޅާ ބަލާއިރު 8.8 އިންސައްތަ އިތުރު އަދަދެކެވެ. މިދިޔަ އަހަރުގެ މިހާތަނަށް ރާއްޖެއަށް އައިސްފައިވަނީ 1.7 މިލިޔަން ފަތުރުވެރިންނެވެ.

ރާއްޖެއަށް ފަތުރުވެރިން އެންމެ ގިނައިން އައިސްފައި ވަނީ ޗައިނާއިންނެވެ. އެގޮތުން އެ ގައުމުން ރާއްޖެއަށް 259،222 ފަތުރުވެރިން ޒިޔާރަތްކުރި އިރު މި ލިސްޓުގައި ދެވަނައިގައި އޮގް ރަޝިޔާއިން ވަނީ 214،271 ފަތުރުވެރިން އަދި ތިންވަނައިގައި އޮތް އިނގިރޭސިވިލާތުން 170،906 ފަތުރުވެރިން ވަނީ ޒިޔާރަތް ކޮށްފައެވެ.

މި އަހަރުގައި ބާކީ 14 ވަރަކަށް ދުވަސް އޮތްއިރު، ސަރުކާރުން އަމާޒަކީ މިއަހަރު ރާއްޖެއަށް ދެ މިލިޔަން ފަތުރުވެރިން ގެނައުމެވެ. އަދި އަހަރުގެ މިހާތަނަށް ރާއްޖެއަށް 1.9 މިލިޔަން ފަތުރުވެރިން އައިސްފައިވާއިރު މިއަހަރުގެ އަމާޒު ހާސިލްކުރަން ދެން ބޭނުންވަނީ 58،805 ފަތުރުވެރިންނެވެ.