އާޓިސްޓަކު ލޮލުން އޮހޮރޭ ކަރުނަ ވަޒަނަށް ބަދަލުވާ ބަޑިއެއް އުފައްދައިފި ކަމަށް މީޑިއާތަކުން ރިޕޯޓު ކޮށްފިއެވެ.

އީޓައިމްސްގެ ރިޕޯޓެއްގައި ބުނެފައިވަނީ މި ބަޑި އުފައްދާފައިވަނީ ނެދަލޭންޑުގައި ތައުލީމު ހާސިލްކުރަމުންދިޔަ ތައިވާނުގެ އާޓިސްޓެއް ކަމަށްވާ ޔީ ފެއި ޗެން ކަމަށެވެ. އަދި މިއީ އޭނާގެ ފައިނަލް ގްރެޖުއޭޝަން ޕްރޮޖެކްޓުގެ މޮޑެލް އެއް ކަމަށްވެސް ރިޕޯޓުގައި ވެއެވެ.

ޔީ ފެއި ޗެން ބުނެފައިވާ ގޮތުގައި އޭނާއަށް މި ބަޑި އުފެއްދުމުގެ ހިޔާލު ލިބިފައިވަނީ ކޮލެޖުގެ ޕްރޮފެސަރަަ ދެމެދު ހިނގާދިޔަ ޒުވާބެއްގެ ސަބަބުން އެކަމާ ހިތްހަމަ ނުޖެހި ދެރަވުމުން ކަމަށެވެ. އަދި މި ބަޑި އުފައްދާފައިވަނީ އޭނާއަށް ކުރިމަތިވާ ނުތަނަވަސްވުންތަކަށް ހައްލެއް ހޯދުމަށް ކަމަށްވެސް އޭނާ ވަނީ ބުނެފައެވެ.

މި "ޓިއާ ގަން" އުފައްދަން އޭނާއަށް ތިން މަސްދުވަސް ނެގި ކަމަށްވެސް އީޓައިމްސްގެ ރިޕޯޓުގައި ވެއެވެ. އަދި މި ބަޑި ބޭނުން ކުރުމުން މީހާގެ ކަރުނަތައް އޭގެ ތެރެއަށް ދަމައިގަނެ، ކާބަންޑައިއޮކްސައިޑު ބޭނުން ކޮށްގެން 20 ސިކުންތު ތެރޭގައި އެ ކަރުނަ ވަޒަނަށް ބަދަލުވާ ކަމަށްވެސް ރިޕޯޓުގައި ވެއެވެ.

ޔީ ފެއި ޗެން ވަނީ އިންސްޓަގްރާމުގައި މި ބަޑީގެ ފޮޓޯ އެއް ހިއްސާކޮށް އެތައް ބައެއްގެ ސަމާލުކަންވެސް ހޯދާފައެވެ. އަދި އެތައް ބަޔަކު ވަނީ އޭނާގެ އުފެއްދުންތެރިކަމަށް ތައުރީފު ކޮށްފައެވެ.