ނިރުބަވެރި އިސްރާއީލުން ޣައްޒާއަށް އަރައި ހިންގަމުންދާ ގަތުލުއާންމުގެ ތެރެއިން އެގައުމުގެ ކުޑަކުދިންތަކެއް ޝަހީދުކިށްލައިފިއެވެ.

ޣައްޒާގެ ސިއްހީ ވުޒާރާއާއި ހަވާލަދީ ބޭރުގެ މީޑިޔާތަކުން ރިޕޯޓުކުރާ ގޮތުގައި އިސްރާއީލުގެ ސިފައިން ޣައްޒާގެ އުތުރުގައި ދިން ހަމަލާތަކެއްގައި ފަލަސްތީނުގެ 16 މީހަކު ވަނީ މަރުވެފައެވެ. އޭގެ ތެރޭގައި ކުޑަކުދިންނާއި އަލް އަހްލީ އަރަބި ހޮސްޕިޓަލުގެ ޑޮކްޓަރަކުވެސް ހިމެނެ އެވެ.

ކުށެއް ނެތް އެތައް ކުޑަކުދިންތަކެއް އިސްރާއީލުން މަރަމުންދާއިރު މިފަދަ ހަމަލާތައް ފަހަކަށް އައިސް އިތުރުވަމުންދާކަންވެސް ފާހަގަ ކުރެވެއެވެ. އަދި ފަހަކަށް އައިސް އިސްރާއީލުގެ ހަމަލާތައް އެންމެ ގިނައިން އަމާޒުވާތަންތަނުގެ ތެރޭގައި ގެދޮރުގެއްލިފައިވާ އާއިލާތަކުން ބޯހިޔާވަހިކަން ހޯދަމުންދާ ސްކޫލްތަކާއި އެހީދޭ ފަރާތްތަކުން އެހީ ބަހަމުންދާ ތަންތަން ހިމެނެއެވެ.

އދ. ގެ އިންސާނީ އެހީދޭ ފަރާތްތަކުން ބުނާ ގޮތުގައި ނިރުބަވެރި އިސްރާއީލުން ވަނީ އެމީހުން ހިފާފައިވާ ހުޅަނގު އައްސޭރީގައި ހުންނަ ޖެނިން ރެފިއުޖީ ކޭމްޕުގައި ތިބި ފަރާތްތަކަށް އެހީގެ ތަކެތި ލިބޭނެ ހުރިހާ މަގުތަކެއް ބަންދުކޮށްފައެވެ. އެގޮތުން އދ. އިން ބުނީ މި ކޭމްޕަށް އެހީ ފޯރުކޮށް ނުދެވޭތާ މިއަދާ ހަމައަށް 70 ދުވަސް ވެފައިވާ ކަމަށެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި މަދުވެގެން 45،097 ފަލަސްތީނު މީހުން މަރުވެ 107،244 މީހުން ވަނީ ޒަޚަމްވެފައެވެ.