ހިޔާ ފްލެޓްގައި މީހަކު ރަހީނުކުރި މައްސަލައިގައި ޝާމިލުވާ މީހުންގެ މައްޗަށް ދައުވާކުރަން ފޮނުވައިފި އެވެ.

މިދިޔަ މަހުގެ އަށް ވަނަ ދުވަހު ހިޔާ ފްލެޓްގައި މީހަކު ރަހީނު ކުރި މައްސަލައިގައި 12 މީހަކު ހައްޔަރުކުރި އެވެ.

އެ މައްސަލައިގައި ހައްޔަރުކުރި މީހުންގެ ތެރޭގައި ދ. ވާދޫ ވެހި އަލްމާން އަލީ ޚާލިދާއި، މ. ހަތިކަނޑު މުހައްމަދު އިޒްކާން އާއި، ކ. ގުރައިދޫ ޒުނައިޓް ވިލާ އިޛާން އަހުމަދާއި، ށ. ފޯކައިދޫ ދަންމަރު އަހުމަދު ޒާހިދާއި، ލ. މާވަށް އާދަމް ޙުސައިނާއި، ލ. އިސްދޫ ހިޔާލީ ގުލްޝަން އިބްރާހިމް ނަޝީދާއި، ބ. ގޮއިދޫ ނައިޓްސްޓާ އަހުމަދު ސަމީޙު ހިމެނެއެވެ.

އޭގެ އިތުރުން ވ. ގާމާ އިސްމާއިލް ވިސާމް މުހައްމަދާއި، ގދ. ވާދޫ ޗިޗަންޑާގެ ވިޝާމް މުހައްމަދާއި، ހުޅުމާލެ ހިޔާ 14-17-03 ވިސާން މުހައްމަދާއި، ގދ. ވާދޫ ޖަނަވަރީގޭ މުޝްތާޤު ޝާކިރާއި، މ. ކޮޅުފުށީ އާރެސް ހަސަން ޣާލިބް ވެސް މި މައްސަލާގައި ފުލުހުން ވަނީ ހައްޔަރު ކޮށްފައެވެ.

ފުލުހުން މިއަދު މީޑިއާތަކަށް ފޮނުވި މެސެޖުގައި ބުނީ އެ މައްސަލައިގައި ހައްޔަރުކުރި މީހުންގެ ތަހުގީގު ނިންމައި އެ މީހުންގެ މައްޗަށް ދައުވާކުރުމަށް ޕްރޮސިކިއުޓާ ޖެނެރަލްގެ އޮފީހަށް ފޮނުވާފައިވާ ކަމަށެވެ.

އަދި އެ މައްސަލައިގައި ބަންދު ކުރި މީހުން ކޯޓުން ދޫކޮށްލައިފައިވާ ކަމަށް ވެސް ފުލުހުން ބުނެފައި ވެއެވެ.

ފުލުހުން ހިޔާ 9ވަނަ ޓަވަރުގެ 20 ވަނަ ފްލޯގެ 11 ވަނަ އެޕާޓްމަންޓަށް ގަދަބާރުން ވަދެގަތް އިރު، އެތަނުގެ ތެރޭގައި 12 މީހުންގެ ގްރޫޕަކުން ތައްޔާރުވަމުން ދިޔައީ މީހަކު ރަހީނުކޮށް ބޯ ބޭލުމަށް ފަހު، އެ މީހާގެ އިނގިލި ބުރިކުރުމަށެވެ.

ފުލުހުން ބުނީ އެ އެޕާޓްމަންޓަކީ ޑްރަގްގެ މައްސަލައެއްގައި ފުލުހުން އެކި ފަހަރުމަތިން މީގެ ކުރިންވެސް ރެއިޑް ކޮށްފައިވާ އެޕާޓްމަންޓެއް ކަމަށެވެ.