އައިލެންޑް އޭވިއޭޝަން ސާވިސް (އައިއޭއެސް) ގެ ޑެޕިއުޓީ މެނޭޖިން ޑިރެކްޓަރު (ޑީއެމްޑީ)ގެ މަގާމުގައި ކުރިން ހުންނެވި އައިޝަތު ޖެނިފާއަށް އެ މަގާމު އަނބުރާ ދޭން ވަޒީފާއާ ބެހޭ ޓްރައިބިއުނަލުން އެންގި އެންގުމަށް އަމަލުކުރުން މަޑުޖައްސާލަން ހައިކޯޓުން އަމުރުކޮށްފި އެވެ.

އެމްޑީޕީގެ އެކްޓިވިސްޓެއްގެ ގޮތުގައި ކުރިން މަޝްހޫރުވެފައިވާ ޖެނީފާ މަގާމުން ވަކިކުރީ މިހާރުގެ ސަރުކާރުން ވެރިކަަމަށް އައުމަށް ފަހު މިދިޔަ އަހަރުގެ ޑިސެމްބަރު މަހު އެވެ. ނަމަވެސް މިދިޔަ އޮކްޓޯބަރު މަހު ވަޒީފާއާ ބެހޭ ޓްރައިބިިއުނަލުން ވަނީ ޖެނީފާ މަގާމުން ވަކިކުރީ ގޯސްކޮށްކަމަށް ނިންމައި އޭނާއަށް ވަޒީފާއާއި، މާލީގޮތުން ލިބުނު ގެއްލުމުގެ ބަދަލު ނަގައިދިނުމަށް އައިއޭއެސްއަށް އަންގައިފައެވެ.

ނަމަވެސް ފަހުން އައިއޭއެސްއިން އެ މައްސަލަ ހައިކޯޓުގައި އިސްތިއުނާފްކުރީ އެވެ.

އަދި ހައިކޯޓުން އިއްޔެ ވަނީ އެ މައްސަލައިގައި ބަލައި ނިމެންދެން ޓްރައިބިނަލްގެ ނިންމުމަށް އަމަލުކުރަން މަޑުޖައްސާލަން ވެސް އަމުރުކޮށްފަ އެވެ.

އައިލެންޑް އޭވިއޭޝަނުން ކުރިން ބުނެފައިވާ ގޮތުގައި ޖެނީފާ ރިޓަޔަރ ކުރުމުގެ ފުރުސަތު އޭނާއަށް އެ ކުންފުނިން ދިނެވެ. ނަމަވެސް، އޭނާ މަގާމުން ވަކިކުރަން ބޯޑުން ނިންމީ އެ ނިންމުމާ ދެކޮޅު ހެދުމުންކަން ފާހަގަކޮށްފައި ވެއެވެ.

އަދި އައިއޭއެސްއިން ފާހަގަކޮށްފައިވާ ގޮތުގައި ޑީއެމްޑީގެ މަގާމަކީ އެ ކުންފުނީގައި މީގެކުރިން އޮންނަ މަގާމެއް ނޫން ކަމަށާއި ޖެނިފާއަށް ވަޒީފާ ދީފައި ވަނީ މަގާމު އުފެއްދުމަށްފަހު ކަމަށް އެ ކުންފުނިން ވަނީ ބުނެފައެވެ.