ނިރުބަވެރި އިސްރާއީލުން ޣައްޒާގެ ހޮސްޕިޓަލެއް ކައިރިއަށް ދިން ހަމަލާއެއްގައި ފަސް ނޫސްވެރިން މަރުވެފައިވާ ކަމަށް ކަމާބެހޭ ފަރާތްތަކުން ބުނެފި އެވެ.

ޣައްޒާގެ ސިއްހަތާ ބެހޭ ވުޒާރާއިން ބުނީ ނޫސްވެރިންތައް މަރާލާފައިވަނީ އެ ސިޓީގެ އަލް-އައުދާ ހޮސްޕިޓަލުގެ ހަބަރުތައް ގެނެސްދިނުމުގެ މަސައްކަތުގައި ތިއްބާ ކަމަށެވެ. ނޫސްވެރިންނަށް ހަމަލާދިންއިރު އެމީހުން ތިބީ އެމީހުން ދަތުރުކުރާ ވެހިކަލްގައެވެ. އިސްރާއީލުން ހަމަލާދިނީ ނޫސްވެރިން ތިބި ވެހިކަލަށް ކަމަށް މަންޒަރުދުއް ފަރާތްތަކާ ހަވާލަދީ މީޑިޔާތަކުން ރިޕޯޓުކުރެއެވެ.

މި ހަމަލާގެ އިތުރުން އިސްރާއީލުން ވަނީ އިއްޔެ ޣައްޒާ ސިޓީގެ އުތުރުގައި މީހުން ދިރިއުޅޭ އިމާރާތަކަށް ބޮން އަޅާފައެވެ. މި ހަމަލާގައި ފަސް މީހަކު މަރުވެފައިވާއިރު 30 މީހަކު ގެއްލިފައިވާ ކަމަށް ރިޕޯޓްކޮށްފައިވެ އެވެ.

ނިރުބަވެރިންގެ އަނިޔާވެރި ހަމަލާތަކުގައި ޣައްޒާގެ އެތައް ހާސް ބައެއްގެ ގެދޮރު ގެއްލިފައިވާއިރު ބައެއް ފަރާތްތަކުން ބޯހިޔާވަހިކަން ހޯދަމުންދާ ޓެންޓު ތަކަށްވެސް އިސްރާއީލުން ދަނީ ހަމަލާތައް ދެމުންނެވެ.

ޑޮކްޓަރުން ބުނާ ގޮތުގައި ޣައްޒާގެ ދެކުނުގައި ހުރި ޑިސްޕްލޭސްމަންޓް ކޭމްޕްތަކުގައި ފިނީގެ ސަބަބުން ފަލަސްތީނުގެ ތިން ތުއްތު ކުދިން މަރުވެފައިވާ ކަމަށެވެ. މި ކުދިން މަރުވި އިރު އެ ކޭމްޕަށް ކާނާ އާއި ފެނާއި ފިނީގައި ބޭނުންކުރާ ރަޖާތައްފަދަ ޒަރޫރީ ތަކެތި ފޯރުކޮށްދޭން އަންނަ ފަރާތްތަކަށް އިސްރާއީލުން ހުރަސްއަޅަމުންދާކަމުގެ ޝަކުވާވެސް ދަނީ ކުރަމުންނެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި އޮކްޓޯބަރު 7، 2023 އިން ފެށިގެން 45،361 ފަލަސްތީނު މީހުން ޝަހީދުކޮށްލާފައިވާއިރު 107،803 މީހުން ވަނީ ޒަހަމްވެފައެވެ. އެ ދުވަހު ހަމާސް އިސްވެ އޮވެ ދިން ހަމަލާތަކުގައި އިސްރާއީލުގެ 1،139 މީހުން މަރުވެ، 200 އަށް ވުރެ ގިނަ މީހުން ވަނީ އަޅުވެތިކޮށްފައެވެ.