ފަލަސްތީނުގެ ޣައްޒާގެ އުތުރުގައި ހުންނަ ކަމާލް އަދުވާން ހޮސްޕިޓަލުގައި އިސްރާއީލުގެ އަނިޔާވެރި ސިފައިން އަލިފާން ރޯކޮށް އެތަނުގައި ތިބި ބަލިމީހުން މަރުވަން ދޫކޮށްލައިފިއެވެ.

ޣައްޒާގައި ހުންނަ އަލްޖަޒީރާގެ މުވައްޒަފާ ހަވާލަދީ އެ މީޑިޔާއިން ބުނީ އިސްރާއީލުގެ އަސްކަރިއްޔާއިން ހޮސްޕިޓަލް އަންދާލައި، ކަމާލް އަދުވާންގެ ވޯޑްތަކަށް ބޮޑެތި ގެއްލުންތަކެއް ދީފައިވާ ކަމަށެވެ.

މި ހާދިސާ އާ ގުޅިގެން ޣައްޒާގެ ހެލްތު މިނިސްޓްރީން ރިޕޯޓްކުރާ ގޮތުގައި އިސްރާއީލުގެ އަސްކަރިއްޔާއިން ވަނީ ކަމާލް އަދުވާން ހޮސްޕިޓަލުގެ ޑިރެކްޓަރު ހުސާމް އަބޫ ސާފިޔާ ހިމެނޭ ގޮތަށް ހޮސްޕިޓަލުގެ ދިހަވަރަކަށް މުވައްޒަފުންނާ ސުވާލުކުރުމަށް ހައްޔަރުކޮށްފައެވެ.

ނިރުބަވެރި އިސްރާއީލުގެ ސިފައިން ހޮސްޕިޓަލަށް ވަދެގަނެ އެތަނުގެ އައިސީޔޫގައި ތިބި މީހުން ހިމެނޭ ގޮތަށް އެންމެންވެސް ގަދަކަމުން ވަނީ ފެސިލިޓީން ބޭރުކޮށްފައެވެ.

ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން ބުނީ އިސްރާއީލުން ޣައްޒާގެ ސިއްހީ ނިޒާމު ފުނޑުފުނޑުކޮށްލުމަކީ ފަލަސްތީނުގެ ދިހަހާސް މީހުންނަށް މަރުގެ ހުކުމެއް އިއްވުން ކަހަލަ ކަމެއް ކަމަށެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި އޮކްޓޯބަރު 7، 2023 އިން ފެށިގެން މަދުވެގެން 45،436 ފަލަސްތީނު މީހުން މަރުވެ 108،038 މީހުން ވަނީ ޒަހަމްވެފައެވެ. އެ ދުވަހު ހަމާސް އިސްވެ އޮވެ ދިން ހަމަލާތަކުގައި އިސްރާއީލުގައި މަދުވެގެން 1،139 މީހުން މަރުވެ، 200 އަށް ވުރެ ގިނަ މީހުން އަޅުވެތިކޮށްފައިވެ އެވެ.