މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އަށް ދިހަ ލޯންޗް ބަނދެ ދޭނެ ބަޔަކު ހޯދަން ހުޅުވާލައިފި އެވެ.

އެމްޓީސީސީން ބުނީ ދިހަ ލޯންޗް ޑިޒައިންކޮށް، އެ ބަނދެ އަދި އެ އެއްޗެހި ސަޕްލައިކޮށް ދޭން ޝައުގުވެރިވާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުސަތު އަންނަ މަހުގެ 20 ވަނަ ދުވައާ ހަމައަށް ހުޅުވާލާފައިވާ ކަމަށެވެ.

މިކަމާ ގުޅޭ ގޮތުން މައުލޫމާތު ދޭން ބާއްވާ ސެޝަނެއް އަންނަ މަހުގެ ހަތްވަނަ ދުވަހުގެ ހެނދުނު 11:00 ގައި ޒޮނެއިރިޔާ ބިލްޑިންގުގެ ތިން ވަނަ ބުރީގައި ހުންނަ އެމްޓީސީސީގެ ޕްރޮކިއުމަންޓް ޑިވިޝަންގެ މީޓިން ރޫމްގައި އޮންނާނެ ކަމަށް އެ ކުންފުނިން ވަނީ ބުނެފަ އެވެ.

އެމްޓީސީސީން އަންނަނީ ރާއްޖެ ޓްރާންސްޕޯޓް ލިންކް (އާރްޓީއެލް) ގެ ދަށުން އެކި އަތޮޅުތަކަށް ފެރީގެ ހިދުމަތް ދެމުންކަން ފާހަގަ ކުރެވެއެވެ. އަދި އަންނަ އަހަރު ނިމުމުގެ ކުރިން މުޅި ރާއްޖެއަށް އެ ޚިދުމަތް ފުޅާކުރަން ނިންމާފައިވާ ކަމަށް އެ ކުންފުނިން ވަނީ މީގެ ކުރިން ހާމަކޮށްފައެވެ.

މުޅި ރާއްޖެއަށް އާރްޓީއެލްގެ ހިދުމަތްތައް ފުޅާކުރުމަށް އިތުރު 56 ފެރީ ބޭނުންވާ ކަމަށް އެ ކުންފުނިން މީގެ ކުރިން ވަނީ ހާމަކޮށްފައެވެ. އަދި އެ އަދަދަކީ އާރްޓީއެލްގެ ހިދުމަތަށް މިހާރު ބަނދެފައި ހުރި އުޅަނދުތަކުގެ އަގަށް ބަލާ އިރު ގާތްގަނޑަކަށް 508 މިލިއަން ރުފިޔާ ކަމަށްވެސް އެ ކުންފުނިން ބުނެ އެވެ.